سیکیورٹی فورسز نے ضلع بنوں میں انٹیلیجنس بنیاد پر ایک آپریشن کرتے ہوئے خودکش حملے کے مرکزی سہولت کار سمیت دو خطرناک دہشتگردوں کو ہلاک کر دیا ہے۔ مسلح افواج کے شعبہ تعلقات عامہ (آئی ایس پی آر) کے مطابق شدید فائرنگ کے تبادلے کے بعد ہلاک ہونے والوں میں خوارجی رنگ لیڈر وحید اللہ عرف مختیار اور ایک خودکش بمبار شامل ہے۔ آپریشن کے دوران ان سے خودکش جیکٹ، اسلحہ اور بڑی مقدار میں گولہ بارود بھی برآمد کیا گیا۔ وحید عرف مختیار انتہائی مطلوب دہشتگرد تھا جو متعدد دہشتگردانہ کارروائیوں میں ملوث رہا۔ وہ بے گناہ شہریوں اور سیکیورٹی فورسز کے اہلکاروں کی شہادتوں کا ذمہ دار تھا۔ خاص طور پر 21 فروری 2026 کو بنوں میں ہونے والے خودکش حملے کا وہ مرکزی سہولت کار تھا، جس میں لیفٹیننٹ کرنل گل فراز شہید ہوئے تھے۔ آئی ایس پی آر نے بیان میں کہا ہے کہ سیکیورٹی فورسز نے اس گھناؤنے فعل کا بروقت بدلہ لے لیا اور ایک بڑے ممکنہ سانحے کو ناکام بنا دیا۔ پاک فوج کے مطابق علاقے میں بھارتی سرپرستی یافتہ دیگر دہشتگردوں کے خاتمے کے لیے کلیئرنس آپریشن جاری ہے۔ سیکیورٹی فورسز اور قانون نافذ کرنے والے ادارے "عزمِ استحکام” کے تحت دہشتگردی کے مکمل خاتمے تک اپنی کارروائیاں جاری رکھیں گے۔
Discussion about this post