طیارے کی سیٹوں پر شہید بچوں کی تصاویر و بستے

ایران کے اعلیٰ سطحی وفد کی پاکستان آمد کے موقع پر ایک ایسا جذباتی اور دل کو چھو لینے والا منظر سامنے آیا ہے جو پوری دنیا کی آنکھوں میں آنسو بھر گیا۔ ایرانی پارلیمنٹ کے اسپیکر محمد باقر قالیباف نے پرواز کے دوران سوشل میڈیا پر ایک تصویر شیئر کر کے عالمی ضمیر کو جھنجھوڑ دیا۔ تصویر میں طیارے کی خالی نشستوں پر مناب کے شہید بچوں کی معصوم مسکراہٹیں پھولوں سے سجائی گئی تھیں۔ ان کے بستے، جوتے اور یادگار اشیاء بھی ساتھ رکھی گئی تھیں، جیسے وہ خود اس سفر میں ان کے ہمراہ ہوں۔ قالیباف نے لکھا: “سفر کے دوران یہ میرے ساتھی ہیں۔”

یہ خصوصی پرواز “مناب 168 کے نام سے اسلام آباد پہنچی۔ 28 فروری کو مناب کے ایک اسکول پر ہونے والے بھیانک حملے میں 168 معصوم بچوں سمیت سو سے زائد جانوں کا ضیاع ہوا تھا۔ ان بچوں کی یادیں لے کر ایرانی وفد مذاکرات کی میز پر بیٹھا ہے، تاکہ دنیا بھول نہ جائے کہ امن کی بات چیت کے پیچھے کتنے ننھے معصوموں کا خون ہے۔ اس اقدام کا مقصد صرف خراج عقیدت پیش کرنا نہیں، بلکہ عالمی برادری کو اس انسانی المیے کی شدت کا احساس دلانا بھی ہے۔ یہ تصویر امن کی تلاش میں آنے والے وفد کا سب سے طاقتور اور دردناک پیغام بن گئی ہے۔ وفد کی قیادت محمد باقر قالیباف کر رہے ہیں جبکہ وزیر خارجہ عباس عراقچی بھی ان کے ہمراہ ہیں۔ امریکی وفد کی قیادت نائب صدر جے ڈی وینس کے ساتھ جیرڈ کشنر اور اسٹیو وٹکوف کر رہے ہیں۔