جدید کیمروں کے ذریعے خودکار ٹریفک نگرانی کا آغازکردیا

وزیراعلیٰ سندھ مراد علی شاہ نے اعلان کیا ہے کہ اب ٹریفک کی تمام خلاف ورزیاں جدید کیمروں کے ذریعے خودکار طور پر ریکارڈ کی جائیں گی، تاکہ قانون کی پاسداری کو یقینی بنایا جا سکے۔ کراچی میں تقریب سے خطاب کرتے ہوئے انہوں نے کہا کہ رکشہ، گاڑی اور موٹر سائیکل سمیت شہریوں کی بڑی تعداد قانون کی خلاف ورزی کر رہی ہے، اور سندھ میں ڈیجیٹل شفافیت اور جدیدیت کے لیے یہ قدم انتہائی اہمیت کا حامل ہے۔ مراد علی شاہ نے بتایا کہ ای-ٹکٹنگ سسٹم کے ذریعے انسانی مداخلت اور جانبداری کا خاتمہ ہوگا، اور اس نظام کے ذریعے شہریوں کی بہتر خدمت اور حفاظت کو یقینی بنایا جائے گا۔وزیر اعلیٰ سندھ نے کہا کہ منصوبے کے تحت کیمروں کی تعداد 12,000 تک بڑھائی جائے گی اور نظام کو مرحلہ وار سندھ بھر میں وسعت دی جائے گی۔ عوامی رہنمائی اور سہولت کے لیے مختلف شہروں میں ٹریک مراکز بھی قائم کیے گئے ہیں۔مراد علی شاہ نے کہا، “آج کے دور میں حکمرانی کو ہوشیار، مؤثر اور جوابدہ ہونا چاہیے، اور سندھ ایک بار پھر فخر سے سب سے آگے کھڑا ہے۔”