پاکستان اور آئی ایم ایف کے درمیان چوتھے اقتصادی جائزے کی گاڑی آخری موڑ پر پہنچ گئی ہے۔ مذاکرات کامیاب ہوئے تو رواں ہفتے اسٹاف لیول معاہدہ بھی ہو سکتا ہے اور اس کے بعد پاکستان کو قرض پروگرام کی پانچویں قسط کے لیے آئی ایم ایف کے ایگزیکٹو بورڈ کی منظوری کا انتظار ہوگا۔
فی الحال سب سے دلچسپ بات پٹرول سبسڈی ہے۔ آئی ایم ایف نے سبسڈی اسکیم جاری رکھنے پر تو رضامندی ظاہر کردی ہے۔ مگر ساتھ ہی یہ بھی واضح کردیا ہے کہ اس دائرے میں مزید صارفین شامل نہیں کیے جائیں گے۔ یعنی رعایت رہے گی مگر رعایت کا دروازہ مزید نہیں کھلے گا۔
پاکستانی حکام اور آئی ایم ایف مشن نے اب میمورنڈم آف اکنامک اینڈ فنانشل پالیسی یعنی ایم ای ایف پی کی تیاری شروع کردی ہے۔ وزارت خزانہ، ایف بی آر اور وزارت پٹرولیم کے حکام سے ملاقاتیں بھی ہو چکی ہیں۔ یوں اصل سوال اب یہ نہیں کہ مذاکرات ہو رہے ہیں یا نہیں بلکہ یہ ہے کہ جو باتیں طے ہو رہی ہیں ان کا بوجھ آگے چل کر کس پر پڑے گا۔
شوگر سیکٹر بھی اسی فہرست میں ہے۔ آئی ایم ایف چاہتا ہے کہ صوبوں کی رضامندی سے شوگر سیکٹر کو ڈی ریگولیٹ کیا جائے۔ مگر سندھ نے مرکز کی شوگر پالیسی کو صوبائی خود مختاری میں مداخلت قرار دے دیا ہے۔
چنانچہ یہاں بھی وہی پرانا سوال سامنے آ گیا کہ معاشی پالیسی مرکز بنائے گا، صوبہ بنائے گا یا دونوں مل کر بنائیں گے؟
فی الحال جواب آسان نہیں کیونکہ سندھ کے اختلاف کے باعث شوگر پالیسی پر اتفاق نہیں ہو سکا۔
آئی ایم ایف کی نظر آٹو پالیسی پر بھی ہے۔ عالمی مالیاتی فنڈ نے الیکٹرک گاڑیوں کو دی گئی ٹیکس چھوٹ ختم کرنے کا مطالبہ کیا ہے۔ دوسری طرف ایف بی آر نے رواں سال کا ٹیکس ہدف حاصل کرنے کی یقین دہانی کرائی ہے اور آئی ایم ایف نے جولائی سے ستمبر تک محصولات میں ہونے والی پیش رفت پر اطمینان کا اظہار بھی کیا ہے۔
گویا ایک طرف ٹیکس جمع کرنے کی رفتار پر شاباش ہے اور دوسری طرف ٹیکس چھوٹ کے دروازے بند کرنے کی فرمائش۔
توانائی کا معاملہ اس سے بھی زیادہ پرانا ہے۔ آئی ایم ایف نے گردشی قرضے میں کمی، بجلی کی تقسیم کار کمپنیوں یعنی ڈسکوز کے نقصانات پر قابو پانے اور ان کی نجکاری کے لیے اقدامات تیز کرنے پر زور دیا ہے۔
یہ وہی شعبہ ہے جہاں پاکستان برسوں سے ایک ہی دائرے میں گھوم رہا ہے۔ خسارہ، گردشی قرضہ، اصلاحات، یقین دہانیاں اور پھر اگلا جائزہ۔
اب اقتصادی ٹیم نے دسمبر 2026 تک نئے این ایف سی کی یقین دہانی بھی کرادی ہے۔ رواں مالی سال جی ڈی پی کی شرح نمو چار فیصد رہنے کا امکان ظاہر کیا گیا ہے لیکن علاقائی کشیدگی کے باعث کرنٹ اکاؤنٹ خسارے پر دباؤ بڑھنے کا خدشہ بھی موجود ہے۔
یعنی کاغذ پر نمو ہے، خزانے میں ہدف ہے، مذاکرات میں پیش رفت ہے، سبسڈی بھی فی الحال قائم ہے، مگر ساتھ ہی ہر طرف ایک شرط بھی لگی ہوئی ہے۔ یہی شاید پاکستان اور آئی ایم ایف کے تعلق کی سب سے مستقل تصویر ہے۔
پاکستان کو پیسہ چاہیے، آئی ایم ایف کو اصلاحات چاہییں۔ پاکستان کو سبسڈی چاہیے، آئی ایم ایف کہتا ہے دائرہ نہ بڑھاؤ۔ پاکستان کو صنعت اور صارفین کے لیے سہولتیں چاہییں، آئی ایم ایف ٹیکس چھوٹ دیکھتا ہے۔ پاکستان کو توانائی کا نظام چلانا ہے، آئی ایم ایف گردشی قرضہ اور ڈسکوز کے نقصانات گنتا ہے۔
آخر میں معاملہ پھر وہیں آ کھڑا ہوتا ہے جہاں سے شروع ہوا تھا۔ پاکستان کو قرض پروگرام کی اگلی قسط چاہیے۔ اس کے لیے اسٹاف لیول معاہدہ چاہیے۔ اس کے لیے ایم ای ایف پی مکمل ہونا ہے۔ پھر آئی ایم ایف کا مجموعی جائزہ آئے گا اور اس کے بعد ایگزیکٹو بورڈ فیصلہ کرے گا۔
یعنی ابھی منزل نہیں آئی، صرف اگلے پڑاؤ تک پہنچنے کی امید پیدا ہوئی ہے۔ سوال صرف یہ نہیں کہ آئی ایم ایف اس بار پاکستان کے ساتھ معاہدہ کر لیتا ہے یا نہیں۔ اصل سوال یہ ہے کہ ہر جائزے کے ساتھ ہم کتنی دیر کے لیے مسئلہ حل کرتے ہیں اور کتنی جلدی اگلے جائزے کے لیے نیا مسئلہ تیار کر لیتے ہیں؟
پٹرول کی سبسڈی اس بار بچ گئی، مگر اس کی حد بھی طے ہو گئی۔ اب دیکھنا یہ ہے کہ پاکستان اس حد کے اندر رہ کر معیشت چلاتا ہے یا پھر اگلے مذاکرات میں ایک بار پھر یہی سوال سامنے آتا ہے کہ رعایت کتنی چاہیے اور اس کی قیمت کون ادا کرے گا؟
Discussion about this post