اقوام متحدہ کا پاکستان کے سیلاب متاثرین کے لیے ہنگامی ریلیف کا اعلان

اقوام متحدہ نے پاکستان میں حالیہ مون سون بارشوں اور تباہ کن سیلاب کے نتیجے میں متاثرہ افراد کی فوری مدد کے لیے 6 لاکھ امریکی ڈالر کی ہنگامی امداد جاری کر دی ہے۔ یہ اعلان یو این سیکریٹری جنرل کے ترجمان نے نیویارک میں صحافیوں سے گفتگو کرتے ہوئے کیا۔ ترجمان کے مطابق گزشتہ 10 روز کے دوران بارشوں اور سیلابی ریلوں نے ملک بھر میں تباہی مچا دی، جس کے نتیجے میں 400 سے زائد افراد جاں بحق اور 190 سے زیادہ زخمی ہو چکے ہیں۔ مزید یہ کہ 20 ہزار سے زائد افراد بے گھر ہو کر کھلے آسمان تلے زندگی گزارنے پر مجبور ہیں، جنہیں فوری طور پر پناہ گاہوں، طبی امداد اور نقد معاونت کی اشد ضرورت ہے۔ اقوام متحدہ نے خبردار کیا ہے کہ متاثرہ علاقوں میں صاف پانی، حفظانِ صحت کے آلات اور خصوصاً خواتین و بچیوں کے تحفظ کے لیے ہنگامی اقدامات نہایت ضروری ہیں۔ ترجمان کے مطابق 26 جون سے جاری بارشوں اور سیلاب نے بڑے پیمانے پر انفراسٹرکچر کو تباہ کیا ہے اور صورتحال تیزی سے سنگین تر ہو رہی ہے۔

مقامی حکام کے مطابق مجموعی طور پر سیلاب اور لینڈ سلائیڈنگ کے باعث اب تک 798 قیمتی جانیں ضائع ہو چکی ہیں جبکہ ایک ہزار سے زائد افراد زخمی ہیں، جن میں بڑی تعداد خواتین اور بچوں کی ہے۔ ترجمان نے عالمی برادری سے اپیل کی ہے کہ وہ پاکستان کے ساتھ یکجہتی کا مظاہرہ کرے اور سیلاب متاثرین کی مدد کے لیے فوری طور پر آگے بڑھے۔ ان کا کہنا تھا کہ یو این ایجنسیز، مقامی حکام اور شراکت دار اداروں کے ساتھ مل کر ہنگامی ریلیف آپریشن جاری رکھے ہوئے ہیں تاکہ متاثرہ خاندانوں کو فوری سہارا فراہم کیا جا سکے۔