30 روپے کے تنازع پر 2 بھائیوں کو قتل کرنے والے 2 ملزمان مبینہ مقابلے میں ہلاک

لاہور کے علاقے رائے ونڈ میں معمولی 30 روپے کے تنازع پر دو بھائیوں کو بے دردی سے موت کے گھاٹ اتارنے والے ملزمان انجام کو پہنچ گئے۔ پنجاب پولیس کے کرائم کنٹرول ڈپارٹمنٹ (CCD) کے مطابق زیرِ حراست دو ملزمان اویس اور شہزاد مبینہ پولیس مقابلے میں ہلاک ہوگئے۔

ذرائع کے مطابق، سی سی ڈی چوہنگ کی ٹیم گرفتار ملزمان کی نشاندہی پر رائے ونڈ میں چھاپہ مارنے گئی تو اسی دوران ان کے ساتھی توقیر نے دیگر ملزمان کے ہمراہ پولیس پر فائرنگ کر دی۔ فائرنگ کے تبادلے میں زیرِ حراست اویس اور شہزاد مارے گئے جبکہ توقیر اور اس کے ساتھی اندھیرے کا فائدہ اٹھا کر فرار ہونے میں کامیاب ہوگئے۔ پولیس نے علاقے میں سرچ آپریشن شروع کر دیا ہے۔ پولیس کے مطابق ہلاک ملزمان نے چند روز قبل صرف 30 روپے کے جھگڑے پر دو سگے بھائیوں کو تشدد کر کے قتل کر دیا تھا۔ واقعے کی لرزہ خیز ویڈیو سوشل میڈیا پر وائرل ہوئی، جس میں واضح طور پر دیکھا جا سکتا ہے کہ پھل فروش ملزمان ڈنڈوں کے وار سے بھائیوں واجد اور رشید کو خون میں لت پت کر رہے ہیں جبکہ اردگرد کھڑے لوگ بے حسی سے تماشا دیکھ رہے ہیں۔ یاد رہے کہ واقعہ اس وقت پیش آیا جب دونوں بھائی پھل خرید رہے تھے اور معمولی 30 روپے کے جھگڑے پر ملزمان نے پہلے انہیں بدترین تشدد کا نشانہ بنایا۔ اسپتال منتقل کیے جانے کے باوجود ایک بھائی موقع پر ہی دم توڑ گیا، جبکہ دوسرا کومے میں جانے کے بعد اگلے روز زندگی کی بازی ہار گیا۔ لاہور پولیس نے واقعے کے بعد بھرپور کارروائی کرتے ہوئے ایس ایچ او رائے ونڈ محمد ذکا کی سربراہی میں خصوصی ٹیم تشکیل دی، جس نے جدید ٹیکنالوجی اور وسائل استعمال کرتے ہوئے مرکزی ملزم شہزاد کو گرفتار کرنے کا دعویٰ کیا تھا۔ تاہم اب دونوں گرفتار ملزمان مبینہ پولیس مقابلے میں ہلاک ہوچکے ہیں۔