کراچی میں ٹریفک نظام کو جدید ٹیکنالوجی سے ہم آہنگ کرنے کی جانب ایک بڑا قدم اٹھایا جا رہا ہے۔ شہر قائد میں ای ٹریکس نظام کے تحت جاری ای چالان سسٹم میں اب روبوٹس بھی شامل کیے جا رہے ہیں، جو خودکار انداز میں قوانین کی خلاف ورزی کرنے والی گاڑیوں کی نشاندہی کریں گے۔ ڈی آئی جی ٹریفک پیر محمد شاہ نے کراچی میں ایک تقریب سے خطاب کرتے ہوئے بتایا کہ ای چالان کے لیے اب تیسرا اور منفرد طریقہ متعارف کرایا جا رہا ہے , روبوٹس کے ذریعے چالان کا نظام۔ انہوں نے کہا کہ آئندہ ماہ سے شہر کی مختلف شاہراہوں پر “نو پارکنگ” اور “نو ٹو لین” کے نئے بورڈز نصب کیے جائیں گے، جبکہ صدر، طارق روڈ اور دیگر اہم علاقوں میں روبوٹس گشت کریں گے۔
یہ روبوٹس 20 کلومیٹر فی گھنٹہ کی رفتار سے چلیں گے اور دورانِ حرکت گاڑیوں کو اسکین کرتے جائیں گے۔ پیر محمد شاہ کے مطابق، جو بھی گاڑی پارکنگ یا لین کی خلاف ورزی کرے گی، اسے موقع پر ہی ای چالان موصول ہو جائے گا۔ یہ روبوٹک نظام نہ صرف ٹریفک پولیس کی مدد کرے گا بلکہ شہریوں میں قانون کی پاسداری کا شعور بھی بڑھائے گا۔واضح رہے کہ ای ٹریکس سسٹم کے تحت صرف دو ہفتوں کے دوران 50 ہزار کے قریب شہریوں کو ٹریفک قوانین کی خلاف ورزی پر چالان جاری کیے جا چکے ہیں۔ اب روبوٹس کی شمولیت سے توقع ہے کہ کراچی میں ٹریفک نظم و ضبط میں مزید بہتری آئے گی۔
Discussion about this post