پاکستان میں جدید الیکٹرک جاپانی رکشا متعارف

پاکستان میں الیکٹرک گاڑیوں کے شعبے میں ایک اور اہم پیش رفت کے طور پر جاپان کی معروف کمپنی ٹیرا موٹرز نے اپنا جدید بیٹری سے چلنے والا تھری وہیلر رکشا ’کیورو‘ متعارف کروا دیا ہے۔یہ نیکسٹ جنریشن الیکٹرک تھری وہیلر شہری سفری ضروریات کے ساتھ ساتھ لاسٹ مائل لاجسٹکس یعنی سامان کی ترسیل میں بھی اہم کردار ادا کرے گا۔ کیورو کی رفتار 55 کلومیٹر فی گھنٹہ سے زائد ہے اور یہ ایک چارج پر  200 کلومیٹر تک کا فاصلہ طے کر سکتا ہے۔

اس میں نصب 11.7 کلوواٹ آور بیٹری صرف 4 گھنٹوں میں مکمل چارج ہو جاتی ہے اور دشوار گزار پہاڑی راستوں پر بھی آسانی سے چڑھائی ممکن بناتی ہے۔ یہ ماحول دوست اور کفایتی ٹیکنالوجی کی حامل گاڑی کم آپریٹنگ اخراجات کی بدولت شہریوں اور کاروباری طبقے دونوں کے لیے پرکشش انتخاب ثابت ہو سکتی ہے۔ ٹیرا موٹرز کے منیجنگ ڈائریکٹر گو سوزوکی نے کہا کہ ’کیورو‘ نہ صرف شہری ٹرانسپورٹ میں جدت لائے گا بلکہ ایندھن پر انحصار میں کمی، روزگار کے مواقع میں اضافہ اور ماحولیاتی بہتری کے فروغ کا سبب بھی بنے گا۔ انہوں نے مزید کہا کہ کمپنی پاکستان میں قابل اعتماد ڈسٹریبیوشن پارٹنرز کی تلاش میں ہے تاکہ مقامی سطح پر سرمایہ کاری، ٹیکنالوجی کا تبادلہ، ہنر مندی کی ترقی اور لوکل ویلیو ایڈیشن کو فروغ دیا جا سکے۔