شاہ رخ خان کے لیے دبئی میں گلوبل اسٹائل آئی کون ایوارڈ

بالی ووڈ کے شاہ رخ خان کو دبئی میں منعقدہ شاندار تقریب میں گلوبل اسٹائل آئیکون ایوارڈ سے نوازا گیا۔59 سالہ شاہ رخ خان نے خطاب کے دوران عاجزی کا مظاہرہ کیا اور کہا کہ وہ خود کو فیشن کے ماہر نہیں سمجھتے، اور عام طور پر سادہ لباس کو ترجیح دیتے ہیں، جسے حاضرین نے بے حد سراہا۔ اسی تقریب میں مشہور فیشن ڈیزائنر منیش ملہوترا کو کاؤچر ڈیزائنر آف دی ایئر کے اعزاز سے نوازا گیا، اور یادگار لمحے کے طور پر منیش نے شاہ رخ خان کے لیے سیاہ سوٹ بھی تیار کیا تھا۔ تقریب سے ایک روز قبل شاہ رخ خان نے فاتحین کے اعزاز میں منعقد نجی عشائیے میں شرکت کی، جہاں ان کا سادہ مگر باوقار انداز ایک بار پھر سب کی توجہ کا مرکز بنا۔ گلوبل اسٹائل آئیکون ایوارڈ صرف لباس یا فیشن کا اعتراف نہیں بلکہ عالمی سطح پر شاہ رخ خان کے ثقافتی اثر و رسوخ کا بھی مظہر ہے۔دنیا بھر میں کروڑوں مداح رکھنے والے شاہ رخ خان نہ صرف فلمی دنیا بلکہ فیشن اور ثقافتی رجحانات پر بھی گہرا اثر رکھتے ہیں، اور یہ ایوارڈ اسی مقام کی تصدیق کرتا ہے۔