طلبہ کے لیے تاریخ ساز خوشخبری! گوگل پنجاب میں ایک لاکھ طلبہ کو مفت سرٹیفکیشن دے گا

پنجاب کے طلبہ کے لیے ایک سنہری موقع آ چکا ہے۔ گوگل نے پنجاب میں ایک لاکھ سے زائد طلبہ کو عالمی معیار کے سرٹیفکیشن کورسز مفت فراہم کرنے کا اعلان کر دیا ہے۔ وزیراعلیٰ مریم نواز شریف کی زیر صدارت منعقدہ خصوصی اجلاس میں یہ خوشخبری سرکاری سطح پر بھی دہرائی گئی۔ اس منصوبے کے تحت طلبہ سے 400 سے ایک ہزار ڈالر تک کی فیس معاف کر دی جائے گی۔ سائبر سیکیورٹی، مصنوعی ذہانت (اے آئی)، بزنس انٹیلی جنس اور دیگر جدید شعبوں میں تین سے چھ ماہ کے اعلیٰ کورسز سرکاری اور نجی دونوں تعلیمی اداروں کے طلبہ کو مفت دیے جائیں گے۔ یہ قدم طلبہ کو عالمی مارکیٹ کے مطابق ہنر مند بنانے کی طرف ایک بڑا سنگ میل ہے۔  اجلاس میں وزیراعلیٰ مریم نواز نے طلبہ کی فلاح و بہبود کے لیے متعدد تاریخی فیصلے کیے۔ سی ایم پنجاب لیپ ٹاپ اسکیم پر 98 فیصد طلبہ نے مکمل اطمینان کا اظہار کیا۔ وزیراعلیٰ نے ہدایت کی کہ اقلیتوں کے طلبہ کو بھی اوپن میرٹ پر لیپ ٹاپ دیے جائیں۔ فیز ون میں 38 ہزار سے زائد طلبہ مستفید ہو چکے ہیں جبکہ فیز ٹو کے لیے ایک لاکھ 42 ہزار سے زیادہ درخواستیں موصول ہو چکی ہیں۔

سب سے بڑی خوشخبری ہونہار اسکالرشپ پروگرام کی ہے۔ پنجاب کی تاریخ میں پہلی بار 62 ہزار 949 طلبہ کو ایک ساتھ وظائف دیے جائیں گے۔ اس کے علاوہ بصارت سے محروم اور دیگر خصوصی ضروریات والے طلبہ کو بھی اسکالرشپس فراہم کی جائیں گی۔  اجلاس میں مزید فیصلے بھی کیے گئے جن میں 29 اضلاع کے 36 کامرس کالجز کو 19 سرکاری یونیورسٹیوں سے الحاق، 166 سرکاری کالجز میں جدید آئی ٹی لیبز کا قیام، کالجز میں پرنسپلز اور اساتذہ کے لیے کارکردگی کے نئے معیار (KPI)، اور کالج طلبہ کے لیے الیکٹرو بس سہولت شامل ہیں۔  پیکٹا کے تحت گریڈ 8 کے امتحانات میں طالبات نے شاندار کارکردگی دکھاتے ہوئے 92 فیصد کامیابی حاصل کی، جبکہ طلبہ کا تناسب 84 فیصد رہا۔ وزیراعلیٰ نے طالبات کی پہلی تین پوزیشنوں پر فخر کا اظہار کیا۔  یہ تمام اعلانات پنجاب کے نوجوانوں کے روشن مستقبل کی طرف ایک واضح اور پُرجوش قدم ہیں۔ مریم نواز کی قیادت میں تعلیم کے شعبے میں جاری یہ انقلاب طلبہ کو نئی امید اور نئے مواقع فراہم کر رہا ہے۔