امریکی نائب صدر جے ڈی وینس کی وزیراعظم شہباز شریف سے اہم ملاقات

امریکہ کے نائب صدر جے ڈی وینس نے وزیراعظم شہباز شریف سے اسلام آباد میں ملاقات کی۔ ملاقات میں خصوصی ایلچی اسٹیو وٹکوف اور جیرڈ کشنر بھی امریکی وفد کے ساتھ موجود تھے۔اعلامیے کے مطابق ملاقات میں خطے کے اہم امور، امن، استحکام اور باہمی تعاون کے مواقع پر گہری اور تفصیلی گفتگو ہوئی۔ دونوں ممالک نے خطے میں پائیدار امن و استحکام کے لیے مل کر کام کرنے کا عزم کیا۔ پاکستان نے ایران-امریکا مذاکرات میں اپنی سہولت کاری جاری رکھنے کے عزم کا اظہار کیا۔ وزیراعظم شہباز شریف نے ایران اور امریکا دونوں وفود کے تعمیری رویے کی تعریف کرتے ہوئے کہا کہ یہ مذاکرات خطے میں دیرپا امن کی جانب ایک بڑی پیش رفت ثابت ہو سکتے ہیں۔ انہوں نے امید ظاہر کی کہ یہ بات چیت دونوں ممالک کے درمیان اعتماد اور تعاون کو نئی بلندیوں تک لے جائے گی۔ وزیراعظم نے واضح کیا کہ پاکستان خطے میں پائیدار امن کے قیام کے لیے اپنی کوششیں ہر صورت جاری رکھے گا۔ ملاقات میں نائب وزیراعظم و وزیر خارجہ اسحاق ڈار اور وزیر داخلہ محسن نقوی بھی وزیراعظم کے ہمراہ موجود تھے۔