پاکستان شنگھائی تعاون تنظیم سربراہ اجلاس کی میزبانی کرے گا

وزیرِاعظم شہباز شریف نے اعلان کیا ہے کہ پاکستان آئندہ شنگھائی تعاون تنظیم (ایس سی او) سربراہ اجلاس کی میزبانی کرے گا، جس کے لیے انہوں نے حکام کو ہدایت دی ہے کہ تیاریوں کا آغاز ابھی سے کیا جائے تاکہ اس اہم ایونٹ کو شایانِ شان انداز میں منعقد کیا جا سکے۔ اسلام آباد کے ٹی چوک فلائی اوور کے سنگِ بنیاد کی تقریب سے خطاب کرتے ہوئے وزیرِاعظم نے کہا کہ یہ منصوبہ اسلام آباد، راولپنڈی اور گرد و نواح کے لاکھوں شہریوں کے لیے سہولت کا باعث بنے گا۔ ان کا کہنا تھا کہ منصوبہ مختصر وقت میں مکمل کیا جائے گا لیکن معیار پر کسی صورت سمجھوتہ نہیں ہوگا۔ وزیرِاعظم نے وضاحت کی کہ ایک کلومیٹر طویل یہ فلائی اوور ایکسپریس وے سمیت دیگر اہم راستوں تک آمد و رفت کو نہایت آسان بنا دے گا۔ انہوں نے بتایا کہ عوامی سہولت کے لیے اسلام آباد اور راولپنڈی کے درمیان ریل سروس بھی شروع کی جائے گی۔ اس سے قبل میٹرو بس، نئی بسوں اور الیکٹرک ٹرانسپورٹ کی فراہمی سے بھی شہریوں کو ریلیف دیا جا چکا ہے۔ ریل منصوبے کے مکمل ہونے پر دونوں شہروں کے مسافروں کو ایک جدید اور سستی سفری سہولت میسر آئے گی۔شہباز شریف نے کہا کہ آئندہ ایس سی او اجلاس کے موقع پر اسلام آباد کو مزید خوبصورت بنایا جائے گا اور رہائش سمیت تمام انتظامات عالمی معیار کے مطابق ہوں گے۔ ان کے بقول:
"یہ وقت ہے کہ ہم پاکستان کا مثبت اور خوش آئند چہرہ دنیا کو دکھائیں۔”