لانگ مارچ کوریج کے لیے پیمرا کی نئی ہدایات

پاکستان الیکٹرانک میڈیا ریگولیٹری اتھارٹی نے تحریک انصاف کے سربراہ عمران خان کی لانگ مارچ کے حوالے سے نئی ہدایات جاری کی ہیں ۔ جن کے تحت براہ راست کوریج اور تقاریر نہیں دکھائی جاسکتی بلکہ اس کے لیے تاخیری نظام کو استعمال کرنا ہوگا۔ پیمرا کا کہنا ہے کہ تاخیری نظام نہ لگانے والے ٹی وی چینلز کے لائسنس کی معطلی سمیت ان کے خلاف قانونی ایکشن ہوگا۔ تمام چینلز ریاستی اداروں کو بدنام کرنے والا مواد نشر کرنے سے احتراز کریں۔ پیمرا کے مطابق جمعے کو لانگ مارچ کی کوریج ٹرانسمیشن میں مشاہدے میں آیا ہے کہ تقاریر میں ریاستی اداروں کے خلاف بیانات لائیو نشر ہوئے جو ضابطۂ اخلاق اور اعلیٰ عدالتوں کے احکامات کی خلاف ورزی ہے۔