گھر بیٹھے یونین کونسل کا برتھ سرٹیفیکٹ بنوانا آسان

نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے لیے ایک جدید اور آسان سہولت متعارف کروا دی ہے، جس کے بعد اب گھر بیٹھے برتھ سرٹیفیکٹ حاصل کرنا ممکن ہو گیا ہے۔نادرا کی اس نئی سروس کے ذریعے شہریوں کو پیدائش کے اندراج کے لیے اب یونین کونسل کے چکر لگانے کی ضرورت نہیں رہے گی۔ بس اپنے موبائل فون پر پاک آئی ڈی ایپ استعمال کریں اور اپنی متعلقہ یونین کونسل میں  پیدائش کا اندراج کروا لیں۔ یہ سہولت فی الحال پنجاب کے تمام اضلاع، سندھ کے مخصوص علاقوں جیسے کراچی شرقی، وسطی، نوشہروفیروز، میرپورخاص، شہید بینظیرآباد، لاڑکانہ، جامشورو، ٹنڈو الہٰیار اور ٹنڈو محمد خان میں دستیاب ہے۔ اسی طرح بلوچستان کے ضلع کوئٹہ میں بھی موبائل ایپ کے ذریعے اندراج ممکن ہے۔ نادرا کے اعلامیے کے مطابق اس سہولت کا دائرہ کار جلد پورے ملک تک بڑھایا جائے گا اور بہت جلد تمام شہری اپنے گھر بیٹھے برتھ سرٹیفیکٹ حاصل کر سکیں گے۔ یہ اقدام شہریوں کے لیے وقت اور محنت کی بچت کے ساتھ ڈیجیٹل سہولتوں کی جانب ایک اہم قدم قرار دیا جا رہا ہے۔