ایشیا کپ 2025 کی فتح کو "آپریشن سندور” سے جوڑنے پر بھارتی وزیراعظم نریندر مودی کو اپنی ہی اپوزیشن جماعت کانگریس کے شدید ردعمل کا سامنا کرنا پڑا۔ کانگریس نے واضح کیا کہ کھیل کو جنگی بیانیے میں لپیٹنا ناقابلِ قبول ہے۔ پارٹی رہنما اتل پٹیل نے کڑی تنقید کرتے ہوئے کہا:
"کیا مودی کو خارجہ پالیسی اور سفارت کاری کی ذرا بھی سمجھ ہے؟ اگر کرکٹ کھیلا ہے تو اسے کھیل ہی رہنے دیں، اسے جنگی پروپیگنڈے کا ہتھیار نہ بنائیں۔”
مہاراشٹر میں کانگریس کے صدر ہرش وردھن سکپال نے کہا کہ:
"مودی ہوا ہو، پانی ہو یا کھیل، ہر جگہ سیاست اور تقسیم گھسا دیتے ہیں۔ کھیلوں کو سیاسی نفرت کے ایجنڈے کا حصہ بنانا ملکی وقار کے خلاف ہے۔”
فائنل کا پس منظر
گزشتہ روز دبئی میں کھیلے گئے سنسنی خیز فائنل میں بھارت نے پاکستان کو آخری اوور میں 5 وکٹوں سے شکست دے کر ایشیا کپ اپنے نام کیا۔لیکن ٹورنامنٹ جیتنے کے باوجود بھارتی ٹیم کا رویہ متنازع رہا۔ کھلاڑیوں نے ایشین کرکٹ کونسل کے چیئرمین محسن نقوی سے ٹرافی وصول کرنے سے انکار کر دیا۔ محسن نقوی کے ڈٹ جانے پر بھارتی ٹیم کو بالآخر ٹرافی کے بغیر ہی میدان سے باہر جانا پڑا۔
Discussion about this post