ایران کا طاقتور پیغام: جنگ بندی کی خلاف ورزی پر فیصلہ کن جواب تیار

 خاتم الانبیاء ہیڈکوارٹر کے سربراہ  کا کہنا ہے کہ جنگ بندی کی کسی بھی خلاف ورزی کا فیصلہ کن اور مؤثر جواب دینے کے لیے ایرانی مسلح افواج مکمل طور پر تیار ہیں۔انہوں نے زور دے کر کہا کہ ایران نہ صرف عسکری میدان میں برتری رکھتا ہے بلکہ آبنائے ہرمز کے کنٹرول پر بھی اس کا مضبوط اور غیر متزلزل قبضہ ہے۔ انہوں  نے واضح کیا کہ ایران امریکی صدر ڈونلڈ ٹرمپ کو زمینی حقائق کے بارے میں غلط بیانیہ پھیلانے کی ہرگز اجازت نہیں دے گا۔

دوسری جانب ایرانی سفیر رضا امیری مقدم نے ایک طاقتور بیان میں کہا کہ بڑی تہذیب کا حامل ملک دھمکیوں اور دباؤ کے تحت کبھی مذاکرات نہیں کرتا۔ انہوں نے سماجی رابطوں کی ویب سائٹ ایکس پر لکھا کہ یہ ایک اہم اسلامی اور دینی اصول ہے، کاش امریکا اس حقیقت کو سمجھ لے۔ ایرانی عدلیہ کے سربراہ غلام حسین محسنی ایجے نے بھی خبردار کیا کہ امریکا کی جانب سے دوبارہ حملوں کا امکان نظر انداز نہیں کیا جا سکتا۔ انہوں نے تاکید کی کہ ایران کو ہر ممکنہ صورتِ حال کے لیے مکمل طور پر تیار اور چوکس رہنا چاہیے۔ یہ بیانات اس بات کا واضح ثبوت ہیں کہ ایران نہ صرف اپنے حق کی حفاظت کے لیے پرعزم ہے بلکہ علاقائی اور عالمی سطح پر کسی بھی جارحیت کا بھرپور مقابلہ کرنے کی پوری صلاحیت رکھتا ہے۔ دنیا اب ان طاقتور لہروں پر نظر رکھے ہوئے ہے جو خلیج فارس میں ایک بار پھر شدت اختیار کر رہی ہیں۔