ڈکی بھائی کے جوا ایپ پروموشن کیس میں اہم پیشرفت

یوٹیوبر سعد الرحمٰن المعروف ڈکی بھائی کے جسمانی ریمانڈ میں مزید تین دن کی توسیع کر دی گئی۔ تفصیلات کے مطابق ایف آئی اے سائبر کرائم ونگ نے ڈکی بھائی کو دو روزہ ریمانڈ مکمل ہونے پر جوڈیشل مجسٹریٹ کی عدالت میں پیش کیا۔ سماعت کے دوران تفتیشی افسر نے مؤقف اپنایا کہ کیس کی تحقیقات ابھی جاری ہیں، لہٰذا مزید ریمانڈ دیا جائے۔ عدالت نے مؤقف تسلیم کرتے ہوئے یوٹیوبر کا مزید تین روزہ جسمانی ریمانڈ منظور کر لیا۔ یہ چھٹی بار ہے کہ ڈکی بھائی کے ریمانڈ میں توسیع کی گئی ہے۔ ان پر الزام ہے کہ انہوں نے اپنے یوٹیوب چینل کے ذریعے غیر قانونی جوا کھیلنے والی ایپلیکیشنز کی تشہیر کی اور سوشل میڈیا پر فحش مواد اپ لوڈ کیا۔

یاد رہے کہ ڈکی بھائی کے خلاف 17 اگست کی نصف شب لاہور میں نیشنل کرائم ایجنسی نے ریاست کی مدعیت میں مقدمہ درج کیا تھا۔ ایف آئی اے نے ان کے خلاف الیکٹرانک کرائمز ایکٹ 2016 کی دفعات 13 (الیکٹرانک جعلسازی)، 14 (الیکٹرانک فراڈ)، 25 (اسپیم)، 26 (اسپوفنگ) کے ساتھ ساتھ پاکستان پینل کوڈ کی دفعات 294-بی اور 420 بھی شامل کی ہیں۔