اسلام آباد کی انسدادِ دہشت گردی عدالت نے پاکستان تحریکِ انصاف (پی ٹی آئی) کے تین اہم رہنماؤں عمر ایوب، شیخ وقاص اکرم اور زرتاج گل کے وارنٹِ گرفتاری جاری کرتے ہوئے انہیں گرفتار کر کے عدالت میں پیش کرنے کا حکم دے دیا ہے۔ یہ پیش رفت سنگجانی جلسہ کیس کی سماعت کے دوران ہوئی، جس کی صدارت انسدادِ دہشت گردی عدالت کے جج طاہر عباس سپرا نے کی۔ عدالت نے ریمارکس دیے کہ ملزمان اب تک ایک بار بھی مقدمے کی کارروائی میں پیش نہیں ہوئے، اس لیے حاضری سے استثنا کی درخواست مسترد کی جاتی ہے۔ سماعت کے دوران پی ٹی آئی رہنماؤں کی جانب سے سردار محمد مصروف خان، آمنہ علی اور مرتضیٰ طوری ایڈووکیٹ پیش ہوئے، تاہم عدالت نے غیر حاضری پر برہمی کا اظہار کیا۔ عدالت نے تینوں رہنماؤں کو آئندہ پیشی پر لازمی طور پر عدالت میں پیش کرنے کی ہدایت کرتے ہوئے کیس کی مزید سماعت 20 اکتوبر تک ملتوی کر دی۔ یاد رہے کہ سنگجانی جلسہ کیس میں پی ٹی آئی رہنماؤں پر عوامی املاک کو نقصان پہنچانے، اشتعال انگیزی پھیلانے اور عوامی نظم و ضبط کی خلاف ورزی کے الزامات عائد ہیں۔
Discussion about this post