فیلڈ مارشل عاصم منیر کا اوورسیز پاکستانیوں سے خطاب

امریکا کے سرکاری دورے پر موجود چیف آف آرمی اسٹاف فیلڈ مارشل سید عاصم منیر نے واشنگٹن ڈی سی میں مقیم اوورسیز پاکستانیوں سے ایک پُراثر ملاقات کی، جس میں وطن سے دور بسنے والوں کی حب الوطنی، خدمات اور قربانیوں کو زبردست خراجِ تحسین پیش کیا گیا۔ آئی ایس پی آر کے مطابق پاکستانی کمیونٹی کی بڑی تعداد نے اس ملاقات میں شرکت کی اور اپنے سپہ سالار کا والہانہ استقبال کیا۔ ہال تالیوں سے گونج اٹھا جب فیلڈ مارشل عاصم منیر نے انہیں ’پاکستان کے اصل سفیر‘ قرار دیا۔ انہوں نے کہا کہ ترسیلات زر، سرمایہ کاری، اور مختلف شعبہ جات میں نمایاں کامیابیاں حاصل کر کے اوورسیز پاکستانی نہ صرف ملکی معیشت کو سہارا دے رہے ہیں بلکہ پاکستان کی عالمی ساکھ کو بھی روشن کر رہے ہیں۔ ملاقات کے دوران کمیونٹی نے حالیہ آپریشن بنیانِ مرصوص / معرکۂ حق میں پاک فوج کی جرأت اور پیشہ ورانہ مہارت کو سراہا، اور فوجی قربانیوں پر فخر کا اظہار کیا۔

سپہ سالار نے ان کی باتوں کو نہایت سنجیدگی سے سنا اور اُن کے خیالات کو اہم قرار دیا۔ فیلڈ مارشل  سید عاصم منیر نے کہا کہ آج کے پاکستان کو کئی چیلنجز درپیش ہیں، لیکن اگر اندرون و بیرون ملک بسنے والے پاکستانی مل کر، ایک جذبے اور ویژن کے ساتھ آگے بڑھیں، تو کوئی رکاوٹ ہماری راہ نہیں روک سکتی۔ اس ملاقات کا اختتام ایک نئے عزم اور ولولے کے ساتھ ہوا، جہاں فیلڈ مارشل عاصم منیر اور اوورسیز پاکستانیوں نے ایک خوشحال، محفوظ اور مستحکم پاکستان کے لیے مل کر کام کرنے کا پختہ عہد کیا۔