امریکا کے ساتھ تجارت اور سرمایہ کاری بڑھانا چاہتے ہیں

وفاقی وزیر خزانہ محمد اورنگزیب نے کہا ہے کہ پاکستان امریکا کے ساتھ تجارت اور سرمایہ کاری کے شعبے میں تعاون کو وسعت دینے کا خواہاں ہے۔ واشنگٹن میں امریکی حکام سے ملاقات کے بعد میڈیا سے گفتگو کرتے ہوئے وزیر خزانہ نے کہا کہ "امریکا پاکستان کا سب سے بڑا تجارتی شراکت دار ہے، اور دونوں ممالک کے درمیان کچھ اہم امور پر بات چیت ہونا باقی ہے، جس کا جلد اعلان متوقع ہے۔” محمد اورنگزیب کی سربراہی میں پاکستانی وفد نے امریکی نائب وزیر خزانہ ہاورڈ لٹنک اور امریکی تجارتی نمائندے جیمیسن گریئر سے ملاقات کی۔ اس ملاقات میں پاک امریکا تجارتی و معاشی تعلقات کو مضبوط بنانے کے عزم کا اعادہ کیا گیا۔ وزیر خزانہ نے کہا کہ انہیں امید ہے کہ دونوں ممالک کے درمیان تجارتی مذاکرات تعمیری اور مثبت انداز میں آگے بڑھیں گے، جس سے دوطرفہ معاشی تعاون کو نئی جہتیں ملیں گی۔انہوں نے مزید کہا کہ پاکستان عالمی معیشت کا متحرک حصہ بننے کے لیے پرعزم ہے، اور امریکا کے ساتھ قریبی معاشی تعلقات اس سمت میں ایک اہم قدم ہیں۔