ٹرمپ کے بیان پر ایمنسٹی کی خطرناک تنقید

بین الاقوامی انسانی حقوق کی معتبر تنظیم ایمنسٹی انٹرنیشنل کی سربراہ انیئس کالامار نے امریکی صدر ڈونلڈ ٹرمپ کی ایران کے خلاف جاری دھمکیوں کو شدید تنقید کا نشانہ بناتے ہوئے انہیں "نفرت انگیز” قرار دیا ہے۔ اپنے بیان میں انیئس کالامار نے کہا کہ ایران کے شہری انفراسٹرکچر، پلوں اور بجلی گھروں کو نشانہ بنانے کی دھمکیاں انتہائی خطرناک اور غیر ذمہ دارانہ ہیں، کیونکہ ان حملوں کا سب سے بڑا اور براہ راست نقصان عام شہریوں، خواتین اور بچوں کو ہوگا۔  ان کا کہنا تھا کہ اگر ایسے حملے کیے گئے تو لاکھوں لوگ بجلی، پانی اور محفوظ پناہ گاہوں سے محروم ہو جائیں گے، جو انسانی زندگی کو بری طرح متاثر کرے گا۔

ایمنسٹی کی سربراہ نے واضح کیا کہ اس نوعیت کے اقدامات بین الاقوامی انسانی قوانین کی سنگین خلاف ورزی قرار پائیں گے اور یہ ممکنہ طور پر جنگی جرائم کی شکل اختیار کر سکتے ہیں۔انیئس کالامار نے اپنے بیان کے ساتھ صدر ٹرمپ کی دھمکی آمیز سوشل میڈیا پوسٹ بھی شیئر کی، جس میں ایران کے خلاف سخت فوجی کارروائی کا عندیہ دیا گیا تھا۔ انہوں نے عالمی برادری سے پرزور مطالبہ کیا کہ وہ ان خطرناک بیانات اور ممکنہ اقدامات کا فوری نوٹس لے اور خطے میں بڑھتی ہوئی کشیدگی کو روکنے کے لیے ٹھوس اقدامات اٹھائے۔