کوئی سیاسی جماعت یا شخصیت ملک سے مقدم نہیں ہو سکتی

وفاقی وزیرِ اطلاعات عطا  تارڑ نے ایک سخت اور واضح بیان میں کہا ہے کہ مشرق وسطیٰ کی موجودہ نازک صورتحال میں پاکستان کے اہم اور کلیدی کردار پر بھارت شدید بوکھلاہٹ کا شکار ہے۔اسلام آباد میں نیوز کانفرنس سے خطاب کرتے ہوئے انہوں نے کہا کہ وزیر اعظم شہباز شریف اور فیلڈ مارشل عاصم منیر کی مشترکہ کاوشوں سے پاکستان خطے میں امن کی بحالی کے لیے مسلسل اور مؤثر کوششیں کر رہا ہے۔ ان کا کہنا تھا کہ دنیا بھر میں پاکستان کے اس مثبت اور ذمہ دارانہ کردار کو سراہا جا رہا ہے۔  عطا تارڑ نے زور دے کر کہا کہ پاکستان آج عالمی سطح پر ایک موثر اور بھرپور آواز بن کر سامنے آیا ہے اور کوئی بھی سیاسی جماعت یا لیڈر پاکستان سے بڑا نہیں ہو سکتا۔ انہوں نے بانی پی ٹی آئی کے بچوں سے عید پر بات چیت کرانے کا بھی یقین دلایا۔ وزیرِ اطلاعات نے پی ٹی آئی پر سنگین الزام عائد کرتے ہوئے کہا کہ یہ جماعت ملک کے خلاف مہم جوئی میں ملوث ہے۔

ان کا کہنا تھا کہ پی ٹی آئی کے سوشل میڈیا اکاؤنٹس پر اسرائیل کی مذمت تک نظر نہیں آئی، جبکہ سیاسی مخالفت کے نام پر ملک کی تضحیک کرنا بالکل ناقابلِ برداشت ہے۔ عطا تارڑ نے شہباز شریف کی حکومت کی کارکردگی کو بھی اجاگر کیا۔ انہوں نے بتایا کہ موجودہ حکومت نے پاکستان کو ڈیفالٹ کے خطرناک دھانے سے نکال کر ترقی کی راہ پر ڈال دیا ہے اور جی ایس پی پلس سٹیٹس واپس دلوانے سے ایکسپورٹرز کے بڑے نقصان کو روکا گیا ہے۔ انہوں نے کہا کہ ملک کو بچانے کے لیے "پاکستان کھپے” کے نعرے لگائے گئے تھے، اس لیے آج ملک کے خلاف باتیں کرنے والوں کو شرم آنی چاہیے۔