نیشنل سائبر کرائم انویسٹی گیشن ایجنسی نے سوشل میڈیا استعمال کرنے والے شہریوں کے لیے ایک نہایت اہم انتباہ جاری کرتے ہوئے کہا ہے کہ ڈیجیٹل پلیٹ فارمز پر لاپرواہی سنگین قانونی نتائج کو جنم دے سکتی ہے۔ ایجنسی کے مطابق سوشل میڈیا پر گردش کرنے والی کسی بھی خبر، پوسٹ یا لنک کو آگے بڑھانے سے قبل اس کی تصدیق کرنا ہر صارف کی ذمہ داری ہے، کیونکہ بغیر تحقیق معلومات پھیلانا نہ صرف گمراہ کن ہوتا ہے بلکہ قانون کی خلاف ورزی بھی تصور کیا جاتا ہے۔ این سی سی آئی اے نے خبردار کیا ہے کہ اعلیٰ عدلیہ اور ریاستی اداروں کے خلاف غیر مصدقہ، من گھڑت یا جھوٹی معلومات شیئر کرنا قابلِ سزا جرم ہے اور ایسے اقدامات پر سخت قانونی کارروائی عمل میں لائی جا سکتی ہے۔ ایڈوائزری میں یہ بھی واضح کیا گیا ہے کہ پیکا ایکٹ کے سیکشن 26 اے کے تحت فیک نیوز پھیلانے والوں کو تین سال تک قید اور بیس لاکھ روپے تک جرمانے کی سزا دی جا سکتی ہے۔ ایجنسی نے عوام سے اپیل کی ہے کہ وہ نفرت انگیز مواد اور جھوٹی خبروں سے مکمل اجتناب کریں اور سوشل میڈیا کو شعور اور ذمہ داری کے ساتھ استعمال کریں۔ این سی سی آئی اے کے مطابق محتاط، باخبر اور ذمہ دار طرزِ عمل ہی ڈیجیٹل ماحول کو محفوظ اور مثبت بنا سکتا ہے۔
Discussion about this post