اسلام آباد ہائیکورٹ میں ویڈیو ریکارڈنگ پر مکمل پابندی

اسلام آباد ہائیکورٹ نے عدالت کے اندر ویڈیو ریکارڈنگ پر مکمل پابندی عائد کر دی ہے۔ عدالت نے اس سلسلے میں سرکلر جاری کرتے ہوئے واضح کیا ہے کہ سیکیورٹی اہلکار ریکارڈنگ کرنے والوں کے خلاف کارروائی کے مجاز ہوں گے۔ سرکلر کے مطابق، صحافی، وکلا اور سائلین عدالت کے اندر کسی بھی قسم کی ویڈیو ریکارڈنگ نہیں کر سکیں گے۔ پابندی نہ صرف کمرہ عدالت بلکہ راہداری، انتظار گاہ اور دفاتر میں بھی لاگو ہوگی۔ عدالت کے اندر موبائل فون صرف سائلنٹ موڈ میں استعمال کیے جا سکیں گے، جبکہ لائیو اسٹریمنگ اور کیمرے کے استعمال پر بھی مکمل پابندی ہوگی۔ اسلام آباد ہائیکورٹ نے اس اقدام کا مقصد عدالت کے اندر نظم و ضبط قائم رکھنا اور سیکیورٹی کو یقینی بنانا قرار دیا ہے۔