بھارتی ایئر چیف کا جنگ کے 3 ماہ بعد 6 پاکستانی طیارے مار گرانے کا مضحکہ خیز دعویٰ

آپریشن سندور میں پاکستان کے ہاتھوں بدترین شکست کے بعد بھارت شدید بوکھلاہٹ کا شکار ہے۔ مہینوں بعد، اپنی ناکامی پر پردہ ڈالنے کی ناکام کوشش میں، بھارتی فضائیہ کے سربراہ نے یہ حیران کن اور بے بنیاد دعویٰ کر دیا کہ بھارت نے 6 پاکستانی طیارے مار گرائے۔ بھارتی میڈیا کے مطابق، ایئر چیف مارشل اے پی سنگھ نے یہ دعویٰ جنوبی شہر بنگلورو میں ایک میموریل لیکچر کے دوران کیا، جہاں انہوں نے کہا کہ بھارت نے جھڑپوں کے دوران 5 پاکستانی لڑاکا اور ایک ریڈار/نگرانی طیارہ تباہ کیا، اور زیادہ تر حملے روسی ساختہ ایس-400 میزائل سسٹم سے کیے گئے۔ ان کے بقول، یہ ’’تاریخ کا سب سے بڑا زمین سے فضا میں مار کرنے والا حملہ‘‘ تھا، جس پر تقریب میں موجود فوجی اور سرکاری شخصیات نے تالیاں بجائیں۔ تاہم، وہ یہ نہیں بتا سکے کہ کون سے پاکستانی طیارے گرائے گئے، اور ان کے ’’الیکٹرانک ٹریکنگ ڈیٹا‘‘ کا کوئی ثبوت بھی پیش نہ کیا۔ یاد رہے کہ خود بھارتی آرمی چیف ماضی میں پاکستان کے ہاتھوں اپنے طیاروں کی تباہی کا اعتراف کر چکے ہیں۔ اسلام آباد واضح طور پر کہہ چکا ہے کہ 7 سے 10 مئی کے دوران بھارت کوئی بھی پاکستانی طیارہ مار گرانے میں ناکام رہا، جبکہ پاکستان نے اس عرصے میں 6 بھارتی طیارے گرانے کا دعویٰ کیا تھا، جن میں کم از کم ایک فرانسیسی ساختہ رافیل بھی شامل ہے۔ دلچسپ امر یہ ہے کہ فرانسیسی فضائیہ کے سربراہ جنرل جیروم بیلینگر بھی کہہ چکے ہیں کہ انہوں نے 3 بھارتی لڑاکا طیاروں (بشمول ایک رافیل) کی تباہی کے شواہد دیکھے ہیں، مگر بھارتی فضائیہ نے آج تک ان دعوؤں پر کوئی تبصرہ نہیں کیا۔ ماہرین کے مطابق، بھارتی ایئرچیف کا یہ بیان مودی سرکار کی ایک اور سیاسی پروپیگنڈا مہم ہے، جس کا مقصد اندرونِ ملک عوام کو تسلی دینا اور اصل حقائق سے توجہ ہٹانا ہے۔