ژوب میں بڑا آپریشن ، دو روز میں 47 خوارج ہلاک، بھارتی سرپرستی کا انکشاف

بلوچستان کے ضلع ژوب کی تحصیل سمبازہ میں سیکیورٹی فورسز نے پاک–افغان سرحد کے قریب دہشت گردوں کے خلاف بڑے پیمانے پر آپریشن مکمل کرتے ہوئے مزید 14 خوارج کو ہلاک کر دیا۔ یہ تمام دہشت گرد بھارتی سرپرستی میں سرگرم تھے۔ آئی ایس پی آر کے مطابق، 8 اور 9 اگست کی شب دہشت گردوں کی ہلاکت کے بعد علاقے میں کلیئرنس آپریشن جاری رہا، جس کے دوران خفیہ معلومات کی بنیاد پر مزید عناصر کو ٹریس کر کے ختم کیا گیا۔ کارروائی میں بھاری مقدار میں اسلحہ، گولہ بارود اور دھماکا خیز مواد برآمد ہوا۔ گزشتہ شب ہی سیکیورٹی فورسز نے فتنہ الخوارج کے 33 دہشت گرد ہلاک کیے تھے، جس کے بعد دو روزہ آپریشن میں مارے جانے والے دہشت گردوں کی کل تعداد 47 ہو گئی ہے۔ فوجی ترجمان نے واضح کیا کہ پاک فوج اور دیگر سیکیورٹی ادارے ملک کو دہشت گردوں کے ناپاک وجود سے پاک کرنے کے لیے پوری طرح پرعزم ہیں۔ وزیراعظم محمد شہباز شریف نے دہشت گردوں کی دراندازی ناکام بنانے پر سیکیورٹی فورسز کو زبردست خراجِ تحسین پیش کرتے ہوئے کہا کہ جوانوں نے جان پر کھیل کر ملک کو محفوظ بنایا اور دشمن کے ناپاک عزائم کو خاک میں ملا دیا۔ انہوں نے اس عزم کا اعادہ کیا کہ پاکستان سے ہر قسم کی دہشت گردی کا مکمل خاتمہ کیا جائے گا۔