تاجکستان میں انسدادِ دہشت گردی مشق "دوستی ٹو” کامیابی سے مکمل

تاجکستان کے فخروبود بیس پر 4 سے 9 اگست تک جاری رہنے والی مشترکہ انسدادِ دہشت گردی مشق "دوستی ٹو” شاندار کامیابی کے ساتھ اختتام پذیر ہوگئی۔ اس مشق میں پاک فوج کی لائٹ کمانڈو بٹالین کی دو جنگی ٹیموں نے حصہ لیا، جبکہ تاجکستان کی اسپیشل فورسز کی چار ٹیمیں بھی شریک رہیں۔ آئی ایس پی آر کے مطابق، پاکستان کی جانب سے ڈیفنس اتاشی کرنل محمد معظم ظفر نے بطور مہمانِ خصوصی شرکت کی۔ اس موقع پر تاجکستان کے سینئر عسکری حکام بھی موجود تھے۔ مشق کے دوران دونوں ممالک کے دستوں نے پیشہ ورانہ مہارت، اعلیٰ تربیت اور عسکری تعاون کا شاندار مظاہرہ کیا۔ اس دوران انسدادِ دہشت گردی آپریشنز میں استعمال ہونے والے حربی طریقہ کار اور جدید تکنیک پر خصوصی توجہ دی گئی۔ آئی ایس پی آر کے بیان میں کہا گیا کہ تمام تربیتی و عسکری سفارتکاری کے اہداف کامیابی سے حاصل کر لیے گئے، اور یہ مشق پاکستان اور تاجکستان کے مابین دفاعی تعلقات کو مزید مضبوط بنانے میں سنگِ میل ثابت ہوگی۔