پاکستانی سرحد پر دہشتگردی کی بڑی کوشش ناکام، 30 دہشتگرد ہلاک

شمالی وزیرستان میں پاک فوج نے ایک اور بڑی کارروائی کے دوران بھارتی حمایت یافتہ دہشتگرد تنظیم "فتنۃ الخوارج” کی پاکستان میں دراندازی کی کوشش ناکام بنا دی، اور 30 دہشتگردوں کو جہنم واصل کر دیا۔ آئی ایس پی آر کے مطابق یہ کارروائی یکم اور 2 جولائی کی درمیانی شب، اور پھر 2 اور 3 جولائی کی رات کی گئی، جب افغان سرحد کے قریب حسن خیل کے علاقے میں دہشتگرد گروہ کی مشکوک نقل و حرکت دیکھی گئی۔ترجمان پاک فوج کا کہنا ہے کہ:

"فتنۃ الخوارج” جیسے دہشتگرد گروہوں کو بھارت کی مکمل سرپرستی حاصل ہے، جو پاکستان میں دہشتگردی پھیلانے کے ایجنڈے پر سرگرم ہیں۔

لیکن پاکستانی سیکیورٹی فورسز کی بروقت اور بھرپور جوابی کارروائی نے ایک بڑے سانحے کو ٹال دیا۔ کارروائی کے دوران دہشتگردوں سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا۔ آئی ایس پی آر کے مطابق:

"افغان حکومت کو سختی سے کہا گیا ہے کہ وہ اپنی سرزمین کو غیر ملکی پراکسیز کے استعمال سے باز رکھے، اور ان دہشتگرد عناصر کے خلاف کارروائی کرے جو پاکستان کے امن کو تہہ و بالا کرنے کی کوشش کررہے ہیں۔”

پاک فوج نے ایک بار پھر واضح کیا ہے کہ:

"پاکستان کی سیکیورٹی فورسز اپنی سرحدوں کے دفاع اور بھارتی حمایت یافتہ دہشتگردی کو جڑ سے اکھاڑ پھینکنے کے لیے مکمل طور پر پرعزم، چوکنا اور تیار ہیں۔”