جھٹ پٹ 2 منٹ میں تیار ہونے والی میگی نوڈلز بھارتی ریاست کرناٹک کے شہر بلار میں ایک شوہر کے لیے وبال جان بن گئی، روز روز ناشتے، دوپہر اور رات کے کھانے میں میگی نوڈلز سے شوہر اکتا گیا اور بیوی سے راہیں جدا کرنے کا فیصلہ کرلیا۔ یہ واقعہ اس وقت منظر عام پر آیا جب ضلعی اور سیشن کورٹ کے جج ایم ایل راگھوناتھ نے ایک تقریب کے دوران مختلف کیسز میں طلاق کی وجوہات بیان کرتے ہوئے ’میگی کیس‘ کی بھی تفصیلات بیان کی۔
بھارتی میڈیا کے مطابق شوہر نے موقف اختیار کیا کہ بیوی کو یہ نہیں معلوم کے نوڈلز کے علاوہ دیگر کھانے کیسے بناتے ہیں یہ ناشتے، دوپہر کے اور رات کے کھانے میں بھی نوڈلز ہی دیتی ہے۔ شوہر نے عدالت میں بتایا کہ اہلیہ سپر اسٹور گئی اور دیگر سامان خریدنے کے بجائے صرف نوڈلز ہی خرید لائی اور وہی مجھے کھانے میں دیا گیا۔ جج کے مطابق جوڑے کے درمیان مسئلے کے حل کے لیے کوشش کی لیکن دونوں نے بالآخر باہمی رضامندی سے راہیں جدا کرلیں۔
Discussion about this post