ہیوسٹن کے مارکی ایونٹ سینٹر میں پاکستانی امریکی کمیونٹی نے یومِ تشکر کے موقع پر ایک شاندار تقریب میں اپنے اتحاد، ثقافتی ورثے اور اجتماعی کامیابیوں کا جشن منایا۔ یہ تقریب مختلف تعلیمی اداروں کے سابق طلباء اور ممتاز کمیونٹی رہنماؤں کے اشتراک سے منعقد کی گئی، جس کا مقصد پاکستانی نژاد امریکیوں کے درمیان ہم آہنگی کو فروغ دینا اور مستقبل کے لیے مشترکہ اقدامات پر تبادلہ خیال کرنا تھا۔ تقریب کو مرفائی فاؤنڈیشن اور پاکستانی امریکن لیڈرز فورم ، کراچی یونیورسٹی المنائی جیسے اہم اداروں کی حمایت حاصل رہی۔ تقریب کے اسپانسرز میں جاوید فیملی اور ٹیمپورا ریسٹورنٹ شامل تھے۔۔
ہیوسٹن میں پاکستان کے قونصل جنرل، آفتاب احمد چوہدری بھی اس موقع پر موجود تھے۔ انہوں نے کمیونٹی کی کاوشوں کو سراہا اور کہا کہ ایسے پروگرام بیرونِ ملک پاکستانی ثقافت کو زندہ رکھنے اور کمیونٹی کے وقار میں اضافہ کرنے کا بہترین ذریعہ ہیں۔ معروف پاکستانی امریکن سماجی رہنما اور فلاحی شخصیت محمد طاہر جاوید نے بھی شرکاء سے خطاب کرتے ہوئے کہا کہ ہماری طاقت ہمارے اتحاد میں ہے۔ جب ہم مل کر کام کرتے ہیں، تو ہم امریکہ میں بھی مثبت اثر ڈال سکتے ہیں اور پاکستان کے لیے بھی۔ تقریب میں ثقافتی پرفارمنس، روایتی موسیقی، اور نوجوانوں کی شمولیت، تعلیم، اور کمیونٹی کی ترقی سے متعلق آئندہ منصوبوں پر سیر حاصل گفتگو کی گئی۔ شرکاء نے تقریب کو ایک یادگار اور حوصلہ افزا موقع قرار دیا۔
تصاویر بشکریہ : امریکن اردو ڈاٹ ٹی وی
Discussion about this post