یو اے ای میں ورک پرمٹ حاصل کرنے کا نیا آسان طریقہ

متحدہ عرب امارات کی وزارت انسانی وسائل و امارات کاری نے غیر ملکی ہنرمند اور غیرہنرمند افراد کے لیے ورک پرمٹ حاصل کرنے کے عمل کو مزید آسان بنادیا ہے۔ میڈیا رپورٹس کے مطابق یہ طریقہ کار صرف آجر ہی شروع کر سکتا ہے۔ ورک پرمٹ کے حصول کے لیے چار مراحل پر عمل کرنا ہوگا۔ آجر کو یو اے ای پاس یا پھر ڈیجیٹل آئی ڈی کے ذریعے لاگ ان کرنا ہوگا۔ درخواست وزارت کی آن لائن سروس کے تحت جمع کرانی ہوگی۔ مطلوبہ دستاویزات مکمل ہونے پر درخواست الیکٹرانک طور پر منظور کی جائے گی، خامی یا غلطی ہونے کی صورت میں دوبارہ جمع کرانے کا کہا جائے گا۔ منظوری کے بعد حکومتی فیس اور انشورنس یا بینک گارنٹی جمع کرانا ہوگی، اور ملازمت کی آفر لیٹر منسلک کرنا ضروری ہوگا۔  وزارت ہنر مند ملازمتوں کے لیے تعلیمی اسناد کی تصدیق وزارت تعلیم سے کرائے گی اور یہ عمل 2 ہفتے میں مکمل ہوگا۔  مطلوبہ دستاویزات میں پاسپورٹ کاپی، رنگین تصویر اور تصدیق شدہ تعلیمی سند شامل ہیں۔ اگر کسی کی تنخواہ 4,000 درہم سے کم ہو تو وہ ہنر مندکے درجے  میں شمار نہیں ہوگا، چاہے اس کے پاس سند ہو۔ مخصوص پیشوں جیسے ڈاکٹر، استاد، کوچ، اور وکیل کے لیے پیشہ ورانہ لائسنس درکار ہوگا، جو متعلقہ اماراتی ادارے جاری کریں گے۔

پاکستان، افغانستان، عراق اور ایران سے درخواست دہندگان کو اپنا قومی شناختی کارڈ دونوں طرف کی واضح تصاویر کے ساتھ جمع کرانا ہوگا۔ ادارے کے پاس درست تجارتی لائسنس، کوئی خلاف ورزی نہ ہو، الیکٹرانک کوٹہ دستیاب ہو اور دستخط کا قانونی اختیار ہونا ضروری ہے۔ کارکن کی عمر کم از کم 18 سال ہو اور اس کے پاس پہلے سے فعال ورک پرمٹ نہ ہو۔ ورک پرمٹ جاری ہونے کے 6  ماہ کے دوران  تبدیلی کی اجازت ہے بشرطیکہ قومیت تبدیل ہو مگر ملازمت کا عنوان اور جنس وہی رہے۔ اسی طرح  پرانا انٹری پرمٹ وفاقی ادارے کے ذریعے منسوخ کرانا ہوگا۔