پاکستان کے مختلف نجی ٹی وی چینلز نے جمعرات کے روز ذرائع کے حوالے سے دعویٰ کیا ہے کہ امریکی صدر ڈونلڈ ٹرمپ رواں سال ستمبر کے وسط میں اسلام آباد کا اہم دورہ کریں گے۔ میڈیا رپورٹس کے مطابق یہ دورہ 18 ستمبر کے آس پاس متوقع ہے جس میں صدر ٹرمپ پاکستان کی سیاسی و عسکری قیادت سے ملاقاتیں کریں گے، جب کہ اسلام آباد کے بعد وہ بھارت کا دورہ بھی کریں گے۔ تاہم اس مجوزہ دورے کے حوالے سے نہ تو امریکی اور نہ ہی پاکستانی حکام کی طرف سے کوئی باضابطہ تصدیق سامنے آئی ہے۔ خبر رساں ادارے رائٹرز سے گفتگو میں دفتر خارجہ کے ترجمان شفقت علی نے امریکی صدر کے مجوزہ دورے سے لاعلمی کا اظہار کرتے ہوئے کہا کہ تاحال ایسی کوئی اطلاع موصول نہیں ہوئی۔ سیاسی تجزیہ کاروں کا کہنا ہے کہ اگر صدر ٹرمپ کا یہ دورہ حقیقت بن جاتا ہے تو یہ نہ صرف پاکستان کے لیے سفارتی طور پر اہم موقع ہوگا بلکہ جنوبی ایشیا میں امریکا کے کردار کو بھی ایک نئی جہت دے گا۔ یاد رہے کہ ماضی میں امریکی صدور کے جنوبی ایشیا کے دورے ہمیشہ علاقائی توازن اور خارجہ پالیسی کے لیے خاصے اہم سمجھے گئے ہیں۔
Discussion about this post