ٹرمپ آج ایک اہم پریس کانفرنس کریں گے

امریکی صدر ڈونلڈ ٹرمپ آج ایک اہم اور انتہائی توجہ طلب پریس کانفرنس کرنے جا رہے ہیں، جس میں ایران کے ساتھ جاری کشیدگی پر گہری اور فیصلہ کن گفتگو متوقع ہے۔وائٹ ہاؤس کے ترجمان کے مطابق صدر ٹرمپ امریکی وقت کے مطابق دوپہر ایک بجے جبکہ پاکستانی وقت کے مطابق رات دس بجے میڈیا کے سامنے آئیں گے۔ یہ پریس کانفرنس وائٹ ہاؤس کے بریفنگ روم میں منعقد ہوگی، جہاں اعلیٰ ترین فوجی قیادت بھی صدر کے ہمراہ موجود رہے گی۔ ترجمان نے بتایا کہ یہ کانفرنس امریکی میڈیا کے مسلسل اصرار پر بلائی گئی ہے۔ اس موقع پر صدر ٹرمپ ایران سے متعلق موجودہ صورتحال، ممکنہ اقدامات اور مستقبل کی حکمت عملی پر میڈیا کے تمام اہم سوالات کے جواب دیں گے۔ سیاسی و سفارتی حلقوں میں اس پریس کانفرنس کو نہایت اہم سمجھا جا رہا ہے۔ ماہرین کا خیال ہے کہ خطے میں بڑھتی ہوئی کشیدگی کے تناظر میں صدر ٹرمپ کچھ بڑے اور اہم اعلانات بھی کر سکتے ہیں۔