شاہد خاقان عباسی کا نئی سیاسی جماعت بنانے کا اعلان

نون لیگ سے ناراض اور سابق وزیراعظم شاہد خاقان عباسی نے نئی سیاسی جماعت بنانے کا فیصلہ کرلیا ہے۔ میڈیا سے گفتگو کرتے ہوئے ان کا کہنا تھا کہ ایک دوسرے کو کرپٹ کرپٹ کہنا چھوڑنا ہوگا۔ شاہد خاقان عباسی کے مطابق سیاسی جماعتیں ملکی مسائل پر بات نہیں کر رہیں اور اسی کو دیکھتے ہوئے نئی سیاسی جماعت بنا رہے ہیں، عوام کے مسائل کے حل کیلئے کوئی بات نہیں ہورہی، موجودہ انتخابی مہم میں بھی پاکستان کے مسائل پر کوئی بات نہیں کی گئی۔ شاہد خاقان عباسی کا کہنا تھا کہ  الیکشن اتنا متنازع بن گیا ہے کہ ملک کو نقصان پہنچائے گا، جب لوگوں کا سسٹم سے اعتماد اٹھ جائے تو نقصان ہی ہوتا ہے۔ انہوں نے مزید کہا  الیکشن کا یہ حال ہے کہ جیتنے والے بھی آج ہار گئے ہیں۔ حل صرف یہی ہے کہ تمام اسٹیک ہولڈر مل کر بیٹھیں گے تو ملک آگے بڑھے گا ورنہ نقصان اور ہوگا۔