پنجاب: اسکولز میں ” گُڈ ٹچ بیڈ ٹچ ” سے آگاہی کا فیصلہ

محکمۂ داخلہ پنجاب نے اسکول ایجوکیشن ڈیپارٹمنٹ کو”  گُڈ ٹچ بیڈ ٹچ ”  سے آگاہی کے متعلق مراسلہ بھیجا ہے جس کے مطابق  ’گُڈ ٹچ بیڈ ٹچ‘ سے آگاہی بچوں کے نصاب میں شامل کی جائے، بچوں کو ذاتی حفاظت کے بارے میں تعلیم دینا وقت کی ضرورت ہے۔ درست تعلیم اور آگاہی کے بعد بچے نامناسب رویے کو پہچان کر رپورٹ کر سکتے ہیں، والدین اور اساتذہ بچوں کو بتائیں کہ گھر اور باہر نامناسب رویے کو کیسے رپورٹ کیا جائے۔ مراسلے کے مطابق بچوں کو محفوظ بنانا اور استحصال کرنے والوں کے خلاف کارروائی کرنا ریاست کی اولین ذمے داری ہے۔ اس مراسلے میں یہ بھی کہا گیا ہے کہ بچوں کو سکھایا جائے کہ جنسی استحصال کی کوشش کرنے والوں سے ڈرنا نہیں بلکہ ان کو بے نقاب کرنا ہے، بچوں کے نصاب میں گُڈ ٹچ بیڈ ٹچ ماڈیول شامل کرنے کے لیے ماہرین سے مدد لی جائے۔۔ معاملے کی حساسیت کے پیشِ نظر نسلوں کو محفوظ بنانے کے لیے فوری حکمتِ عملی مرتب کی جائے۔