کراچی کے باسیوں کے لیے خوش آئند خبر سامنے آ گئی ہے، جہاں محکمہ موسمیات نے شہر میں بارش کی پیشگوئی کر دی ہے۔ طویل عرصے سے خشک موسم کے بعد بارش کی خبر نے شہریوں کے چہروں پر مسکراہٹ بکھیر دی ہے۔ محکمہ موسمیات کے مطابق کمزور مغربی ہواؤں کا ایک سلسلہ 16 جنوری سے ملک میں داخل ہوگا، جس کے اثرات سندھ کے مختلف اضلاع کے ساتھ ساتھ کراچی میں بھی محسوس کیے جائیں گے۔ پیشگوئی کے مطابق 22 اور 23 جنوری کو شہر قائد میں گرج چمک کے ساتھ بارش ہونے کا امکان ہے۔ محکمہ موسمیات نے بتایا ہے کہ اس دوران بعض علاقوں میں تیز ہوائیں بھی چل سکتی ہیں، جس کے باعث شہریوں کو احتیاطی تدابیر اختیار کرنے کی ہدایت کی گئی ہے۔ خاص طور پر کھلے مقامات، کمزور تعمیرات اور بجلی کے کھمبوں کے قریب احتیاط برتنے کا مشورہ دیا گیا ہے۔ ماہرین موسمیات کا کہنا ہے کہ بارش کے نتیجے میں نہ صرف موسم خوشگوار ہو جائے گا بلکہ سردی کی شدت میں بھی اضافہ متوقع ہے۔ کراچی میں بدلتا ہوا موسم جہاں گرمی اور گرد آلود فضا سے وقتی نجات دلائے گا، وہیں سرد ہواؤں کے ساتھ سردی کا احساس بھی نمایاں ہو سکتا ہے۔
Discussion about this post