غیر ضروری باہر نکلنے پر کریک ڈاؤن ہوگا، اے آئی جی کراچی

ایڈیشنل انسپکٹر جنرل (اے آئی جی) کراچی جاوید عالم اوڈھو نے خبردار کیا ہے کہ بارش اور سیلابی صورت حال کے دوران غیر ضروری طور پر گھروں سے باہر نکلنے والے شہریوں کی گاڑیاں بند کر دی جائیں گی، ان پر جرمانہ بھی عائد ہوگا اور ضرورت پڑنے پر انہیں حراست میں بھی لیا جا سکتا ہے۔ جاوید عالم اوڈھو نے بارش سے متاثرہ علاقوں کا دورہ کیا اور پولیس کے جوانوں کی جانب سے شہریوں کی مدد کو سراہا۔ میڈیا سے گفتگو کرتے ہوئے ان کا کہنا تھا کہ موسلا دھار بارش کے دوران شہری اپنی اور دوسروں کی جان و مال کی حفاظت کے لیے گھروں میں رہیں اور پولیس و ٹریفک اہلکاروں کے ساتھ بھرپور تعاون کریں۔

انہوں نے کہا کہ واضح کیا جاتا ہے کہ اگر کوئی شہری بند کی گئی سڑکوں یا ڈائیورٹ کیے گئے راستوں کا غیر ضروری استعمال کرتا پایا گیا تو اس کے خلاف کارروائی ہوگی، چالان یا حراست دونوں ممکن ہیں۔ اے آئی جی کا کہنا تھا کہ عوام کی حفاظت ہماری اولین ترجیح ہے، کراچی پولیس ہر لمحہ شہریوں کی خدمت اور تحفظ کے لیے موجود ہے، تاہم شہریوں کا تعاون بھی ناگزیر ہے۔

یاد رہے کہ گزشتہ دو روز سے شہر کے مضافاتی علاقے شدید بارش اور سیلابی کیفیت سے دوچار ہیں، متعدد سڑکیں زیر آب ہیں اور سیکڑوں افراد کو ریسکیو کر کے محفوظ مقامات پر منتقل کیا جاچکا ہے۔ اس سے قبل وزیراعلیٰ سندھ اور میئر کراچی نے بھی شہریوں سے اپیل کی تھی کہ وہ غیر ضروری طور پر سفر یا گھروں سے باہر نکلنے سے گریز کریں، تاہم یہ پہلا موقع ہے کہ کراچی پولیس نے شہریوں کو حراست میں لینے کا واضح انتباہ دیا ہے۔