آرمی چیف کی ہدایت پر سیلاب سے متاثرہ علاقوں میں امدادی کارروائیاں جاری ہیں، ڈی جی آئی ایس پی آر

ڈی جی آئی ایس پی آر لیفٹننٹ جنرل احمد شریف چوہدری نے کہا ہے کہ آرمی چیف جنرل عاصم منیر کی ہدایت پر سیلاب سے متاثرہ علاقوں میں پاک فوج کی امدادی کارروائیاں جاری ہیں۔ متاثرہ علاقوں میں پلوں اور شاہراہوں کی بحالی مکمل کرلی گئی ہے۔ امدادی سرگرمیوں کے دوران پاک فوج کے 2 جوان شہید اور 2 زخمی ہوئے۔ وفاقی وزیر اطلاعات عطا تارڑ نے پریس کانفرنس میں بتایا کہ ملک کے 3 بڑے دریاؤں میں سیلابی صورتحال ہے، دریائے ستلج میں ہیڈ خانکی کے مقام پر اس وقت 10 لاکھ کیوسک کا ریلہ موجود ہے۔ متاثرہ علاقوں میں مزید طغیانی کا خدشہ ہے۔ انہوں نے کہا کہ این ڈی ایم اے اور پی ڈی ایم اے مقامی انتظامیہ کے ساتھ مسلسل رابطے میں ہیں اور بروقت انخلا یقینی بنانے کے لیے اقدامات کررہے ہیں۔ وزیراعظم نے بھی ریلیف سرگرمیوں کو تیز کرنے اور پیشگی اطلاع کے نظام کو مزید مؤثر بنانے کی ہدایت دی ہے۔ چیئرمین این ڈی ایم اے کے مطابق دریائے ستلج کے اطراف 2 لاکھ افراد کو محفوظ مقامات پر منتقل کیا جاچکا ہے، جب کہ پنجاب کے شمالی اضلاع میں مزید بارشوں کا امکان ہے۔