تحریک انصاف کا پارلیمانی کمیٹیوں سے مستعفی ہونے کا اعلان

اکستان تحریک انصاف (پی ٹی آئی) نے قومی اسمبلی کی تمام قائمہ کمیٹیوں سے مستعفی ہونے کا اعلان کر دیا ہے۔ پارٹی کے رہنما اور پبلک اکاؤنٹس کمیٹی (پی اے سی) کے رکن ثناء اللہ مستی خیل نے کمیٹی اجلاس کے دوران مستعفی ہونے کا اعلان کیا اور بعدازاں کمیٹی روم چھوڑ کر چلے گئے۔ ان کا کہنا تھا کہ "پی ٹی آئی کے کچھ ارکان کو پارٹی فیصلے کا پیغام موصول ہوگیا ہے، کچھ کو ابھی نہیں پہنچا۔”پی اے سی اجلاس میں سیکریٹری کمیٹی نے بتایا کہ چیئرمین کمیٹی جنید اکبر خان اجلاس میں شرکت نہیں کر رہے، اس لیے اجلاس کی صدارت کے لیے کسی اور رکن کا فیصلہ کیا جائے۔ اس موقع پر اراکین نے متفقہ طور پر سید نوید قمر کو اجلاس کا چیئرمین نامزد کیا، جس کے بعد انہوں نے آج کے اجلاس کی صدارت سنبھال لی۔ ادھر تحریک انصاف کے تمام ارکان نے پبلک اکاؤنٹس کمیٹی کے اجلاس کا بائیکاٹ کر دیا اور کسی بھی رکن نے اجلاس میں شرکت نہیں کی۔