لکی مروت میں پولیس موبائل پر خودکش حملہ، ایک اہلکار شہید

خیبرپختونخوا کے ضلع لکی مروت میں پولیس موبائل کو خودکش حملے کا نشانہ بنایا گیا جس کے نتیجے میں ایک پولیس اہلکار شہید اور متعدد زخمی ہو گئے۔ پولیس کے مطابق واقعہ تھانہ تجوڑی کی حدود میں بخمل احمد زئی کے قریب پیش آیا، جہاں ایک خودکش حملہ آور نے اس وقت خود کو دھماکے سے اڑا لیا جب پولیس موبائل وہاں سے گزر رہی تھی۔ دھماکے کے باعث ایک پولیس اہلکار شہید جبکہ پانچ سے چھ اہلکار زخمی ہوئے، جنہیں فوری طور پر قریبی اسپتال منتقل کر دیا گیا۔ واقعے کے فوراً بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کر دیا گیا۔ پولیس کا کہنا ہے کہ خودکش حملہ آور موقع پر ہی ہلاک ہو گیا، تاہم اس کا ایک ممکنہ ساتھی فرار ہونے میں کامیاب ہو گیا، جس کی تلاش جاری ہے۔ پولیس اور سکیورٹی اداروں نے علاقے میں ناکہ بندی کرتے ہوئے تلاشی کا عمل تیز کر دیا ہے جبکہ واقعے کی مزید تحقیقات بھی جاری ہیں۔