پاکستان کرکٹ بورڈ (پی سی بی) نے لیجنڈز ورلڈ چیمپئن شپ کے فائنل میچ کے ممکنہ بائیکاٹ کی تجویز کو مسترد کرتے ہوئے کھیل کو سیاست سے دور رکھنے کی اپنی مستقل پالیسی پر قائم رہنے کا فیصلہ کیا ہے۔ یہ فیصلہ بورڈ کے گورننگ باڈی کے ایک ہنگامی ورچوئل اجلاس میں کیا گیا، جس کی صدارت چیئرمین پی سی بی محسن نقوی نے امریکا سے ویڈیو لنک کے ذریعے کی۔ اجلاس کا واحد ایجنڈا لیجنڈز لیگ سے متعلق حکمتِ عملی طے کرنا تھا۔
اجلاس میں بعض اراکین نے لیگ کے فائنل میچ کے بائیکاٹ کی تجویز پیش کی۔ ان کا مؤقف تھا کہ ایونٹ کے مالکان اور اسپانسرز بھارتی ہیں اور بھارت، میدانِ جنگ اور ایشین کرکٹ کونسل (ACC) میں ناکامی کے بعد کھیل کو سیاست زدہ کرنے کی کوشش کر رہا ہے۔ اراکین نے مزید نشاندہی کی کہ ایک ٹیم نے ’پاکستان چیمپئنز‘ کے خلاف دونوں میچز کھیلنے سے انکار کیا، اس کے باوجود انہیں سیمی فائنل تک پہنچانے کے لیے ایک پوائنٹ دیا گیا، جو غیرمنصفانہ تھا۔ تاہم، سابق کپتان ظہیر عباس اور متعدد دیگر اراکین نے بائیکاٹ کی مخالفت کی اور زور دیا کہ پاکستان کو اپنے غیرجانبدارانہ اور شفاف طرزِ عمل کو برقرار رکھنا چاہیے۔ ان کا کہنا تھا کہ پاکستان نے کبھی کھیل کو سیاست کے لیے استعمال نہیں کیا اور اب بھی اسی مؤقف پر قائم رہنا چاہیے۔اجلاس کے شرکاء نے اس ضمن میں حتمی فیصلہ چیئرمین پی سی بی محسن نقوی پر چھوڑ دیا، جبکہ ان کی قیادت میں ایشین کرکٹ کونسل کے حالیہ اجلاس کی کامیاب میزبانی پر اعتماد کا اظہار بھی کیا گیا۔ ذرائع کے مطابق اکثریتی اراکین نے اس بات سے اتفاق کیا کہ قومی ٹیم فائنل میچ میں حصہ لے گی، تاہم یہ طے کیا گیا کہ آئندہ ایسے تمام فیصلے صرف پی سی بی کی گورننگ باڈی کی منظوری سے کیے جائیں گے۔
Discussion about this post