مشرقِ وسطیٰ میں جاری بحران پر پاکستان نے اپنا مؤقف واضح کر دیا ہے۔ دفتر خارجہ نے ایک سخت بیان جاری کرتے ہوئے ایران پر اسرائیلی حملوں کو کھلی جارحیت قرار دیا ہے اور کہا ہے کہ یہ حملے علاقائی امن و استحکام کے لیے سنگین خطرہ ہیں۔اسلام آباد سے جاری بیان میں ترجمان دفتر خارجہ نے کہا ہے کہ:
"اسرائیلی فوجی کارروائیاں ایران کی خودمختاری اور علاقائی سالمیت کی کھلی خلاف ورزی ہیں۔
یہ حملے اقوامِ متحدہ کے چارٹر اور بین الاقوامی قانون کی صریح نفی کرتے ہیں۔”
اعلامیے میں مزید کہا گیا کہ اسلامی جمہوریہ ایران کو اقوامِ متحدہ کے چارٹر کے آرٹیکل 51 کے تحت اپنے دفاع کا مکمل اور واضح حق حاصل ہے۔پاکستان نے ایرانی عوام کے ساتھ مکمل یکجہتی کا اظہار کرتے ہوئے، اسرائیل کی جانب سے کی جانے والی کارروائیوں کو اشتعال انگیز اور ناقابلِ قبول قرار دیا ہے۔ پاکستان کی جانب سے یہ بیان ایسے وقت میں سامنے آیا ہے جب ایران پر اسرائیلی حملوں کے بعد خطے میں کشیدگی اپنی انتہا کو پہنچ چکی ہے۔ اسلام آباد نے ایک بار پھر عالمی برادری کو خبردار کیا ہے کہ اگر اس خطرناک روش کو روکا نہ گیا تو خطہ ایک بڑی جنگ کی لپیٹ میں آ سکتا ہے۔
Discussion about this post