اسرائیل کے صومالی لینڈ تسلیم کرنے کے اعلان کو پاکستان نے مسترد کردیا

پاکستان نے اسرائیل کے صومالی لینڈ کو تسلیم کرنے کے اعلان کو فوری طور پر مسترد کر دیا ہے۔ اقوام متحدہ کی سلامتی کونسل کے ہنگامی اجلاس میں پاکستانی نائب مندوب عثمان جدون نے واضح موقف اختیار کرتے ہوئے کہا کہ پاکستان صومالیہ کی علاقائی سالمیت کا پختہ حامی ہے اور بین الاقوامی قوانین کے مطابق اس کی حمایت جاری رکھے گا۔ عثمان جدون نے خبردار کیا کہ اسرائیل فلسطینیوں کو غزہ سے بے دخلی کرکے صومالی لینڈ بھیجنے کی کوشش کر رہا ہے، جو نہ صرف غیر ذمہ دارانہ اقدام ہے بلکہ خطے میں عدم استحکام پیدا کرنے کا خطرہ بھی رکھتا ہے۔ انہوں نے کہا کہ صومالی حکومت ملکی استحکام کے لیے مستحکم اقدامات کر رہی ہے، لیکن اسرائیلی رویہ بین الاقوامی قوانین کی کھلی خلاف ورزی کے مترادف ہے۔ نائب مندوب نے فلسطینی عوام کی بے دخلی کے منصوبے کی بھی سخت الفاظ میں مخالفت کی اور کہا کہ یہ انسانی حقوق کی سنگین خلاف ورزی ہوگی۔ انہوں نے یقین دلایا کہ پاکستان ہر صورت فلسطینی عوام کے حقوق کی حمایت کرتا رہے گا اور اقوام متحدہ کے پلیٹ فارم پر اس معاملے کی پیروی جاری رکھے گا۔ واضح رہے کہ اسرائیل نے صومالی لینڈ کو تسلیم کرنے والا پہلا ملک بن کر عالمی سطح پر ہلچل مچادی ہے، جبکہ یہ علاقہ اب تک کسی بھی ملک کی طرف سے تسلیم نہیں کیا گیا۔ تمام مسلم ممالک نے اس اقدام کو مسترد کیا اور اس پر شدید تشویش کا اظہار کیا ہے۔