گوجرانوالہ : 38 لاکھ 50 ہزار روپے مالیت کا ساڑھے 5 سو کلو چلغوزہ چوری

گوجرانوالہ میں چوری کی ایک حیران کن واردات سامنے آئی ہے جہاں قیمتی چلغوزے کو نشانہ بنا لیا گیا۔ شہر کے علاقے میں ساڑھے پانچ سو کلوگرام چلغوزہ چوری کر لیا گیا، جس کی مجموعی مالیت تقریباً 38 لاکھ 50 ہزار روپے بتائی جا رہی ہے۔ تفصیلات کے مطابق یہ واقعہ چند روز قبل پیش آیا، تاہم اب اس کی سی سی ٹی وی فوٹیج منظرِ عام پر آ گئی ہے۔ ویڈیو میں تین ملزمان کو دن دیہاڑے اطمینان کے ساتھ چلغوزے کی چھ بھری ہوئی بوریاں اٹھا کر لے جاتے ہوئے دیکھا جا سکتا ہے، جس نے سیکیورٹی انتظامات پر بھی سوالیہ نشان کھڑے کر دیے ہیں۔ واقعے کے بعد گوجرانوالہ ماڈل ٹاؤن پولیس نے مقدمہ درج کر لیا ہے اور ملزمان کی تلاش کے لیے تفتیش کا آغاز کر دیا گیا ہے۔

متاثرہ تاجر کا کہنا ہے کہ چوری ہونے والے چلغوزے کی مالیت ساڑھے 38 لاکھ روپے سے زائد ہے، تاہم پولیس ریکارڈ میں نقصان کی رقم ساڑھے تین لاکھ روپے درج کی گئی ہے، جس پر متاثرہ فریق نے تحفظات کا اظہار کیا ہے۔ واقعہ سامنے آنے کے بعد شہری حلقوں میں تشویش پائی جا رہی ہے، جبکہ پولیس کا کہنا ہے کہ سی سی ٹی وی فوٹیج کی مدد سے ملزمان کی شناخت اور گرفتاری کے لیے اقدامات جاری ہیں۔