پی ٹی آئی کے سابق میڈیا کوآرڈینیٹر کی نواز شریف سے معافی

تحریک انصاف کے سابق میڈیا کوآرڈینیٹر جاوید بدر نے نواز شریف کے نام  ایک کھلا خط جاری کیا ہے جس میں انہوں نے نون لیگ کے صدر پر ماضی کے الزامات اور تنقید پر معزرت کی ہے۔ معافی کی درخواست کرتے ہوئے نواز شریف سے کہا کہ وہ ان کے اس عمل کو ان کی کم عقلی اور ناپختگی سمجھیں۔ انہوں نے اس بات پر بھی زور دیا کہ یہ خط کسی بیرونی دباؤ یا ذاتی فائدے کے بجائے اپنے ضمیر اور آخرت میں جوابدہی کے خوف سے رضاکارانہ طور پر لکھا گیا ہے۔ جاوید بدر نے اپنے کھلے خط میں پی ٹی آئی کی قیادت میں سیاسی زہر پھیلانے میں حصہ لینے کا بھی اعتراف کرتے ہوئے لکھا کہ انھوں نے نوجوانوں کو گمراہ کرنے اور معاشرے میں تفرقہ پھیلانے میں کردار ادا کیا ہے۔ انہوں نے گمراہ ہونے والوں کے والدین اور پوری قوم سے بھی معافی مانگی۔جاوید بدر کے خط کے متن کے مطابق  عثمان بزدار کو وزیراعلیٰ بنائے جانے اور بشریٰ بی بی کو مبینہ طور پر کرپشن پر لگام دینے کے بعد انہوں نے پی ٹی آئی سے خود کو دور کیا۔ جاوید نے نواز شریف اور ان کی ٹیم کی پاکستان کے استحکام کےلیے کوششوں کی تعریف کرتے ہوئے ان کی اہم شراکت کا اعتراف کیا۔ ان کا کہنا ہے کہ نواز شریف سے ملاقات کا موقع ملے تو وہ ذاتی طور پر اپنی غلطیوں کا اعتراف کریں گے۔