ملک کی بدنامی کا باعث بننے والے کسی شخص کو بیرونِ ملک سفر کی اجازت نہیں

وفاقی وزیر داخلہ و نارکوٹکس کنٹرول محسن نقوی نے کہا ہے کہ پاکستان کی عزت اور وقار ہمارے لیے سب سے مقدم ہے، اور ملک کی بدنامی کا باعث بننے والے کسی شخص کو بیرونِ ملک سفر کی اجازت نہیں دی جائے گی۔ محسن نقوی نے لاہور ائیرپورٹ کا اچانک دورہ کیا اور امیگریشن کے تمام عمل کا تفصیلی جائزہ لیا۔ انہوں نے امیگریشن کاونٹرز پر مسافروں کی ٹریول ہسٹری کو شناختی کارڈز اور پاسپورٹس سے منسلک کرنے کے جدید نظام کا معائنہ کیا اور اس تیز رفتار اور مؤثر نظام کی کارکردگی پر ڈائریکٹر ایف آئی اے علی ضیاء اور ان کی ٹیم کی سخت تعریف کی۔ وزیر داخلہ نے بیرونِ ملک روانہ ہونے والے اور واپس آنے والے مسافروں سے ملاقات کی اور ان سے امیگریشن کے عمل کے بارے میں رائے لی۔ مسافروں نے اطمینان کا اظہار کرتے ہوئے کہا کہ صرف دو منٹ میں امیگریشن کا عمل مکمل ہو گیا، اور وزیر داخلہ کے دورے سے نظام پہلے سے کہیں زیادہ بہتر اور مؤثر ہو گیا ہے۔ محسن نقوی نے واضح کیا کہ مکمل اور مستند سفری دستاویزات رکھنے والے کسی مسافر کو نہ روکا جائے گا اور نہ روکا جا سکتا ہے، جبکہ نامکمل یا جعلی دستاویزات رکھنے والے کسی بھی صورت سفر نہیں کر سکیں گے۔

وزیر داخلہ نے کہا کہ پاکستان کی عزت ہم سب کی عزت ہے اور کسی بھی شخص کو جس کی وجہ سے وطن کی بدنامی ہو، سفر کی اجازت نہیں دی جا سکتی۔ اس موقع پر ڈائریکٹر ایف آئی اے علی ضیاء سمیت دیگر متعلقہ حکام بھی موجود تھے۔ یہ دورہ اس بات کی عکاسی کرتا ہے کہ ملکی سکیورٹی اور مسافروں کی سہولت دونوں کو یکجا کرتے ہوئے جدید اور مؤثر نظام کو مزید بہتر بنایا جا رہا ہے۔