ملک کی حفاظت اور قومی وقار کے لیے غیر معمولی بہادری اور شجاعت کا مظاہرہ کرنے والے 71 بہادر افراد کو اعلیٰ سول اعزازات دینے کی منظوری دے دی گئی۔ وفاقی وزیر داخلہ محسن نقوی کی زیر صدارت ہونے والے اہم اجلاس میں ان نامور سپوتوں کی قربانیوں اور خدمات کو خراج تحسین پیش کیا گیا۔ محسن نقوی نے اجلاس سے خطاب کرتے ہوئے کہا:
"ملک و قوم کے تحفظ کے لیے جانوں کا نذرانہ پیش کرنے والوں اور بے مثال جرات کا مظاہرہ کرنے والے افراد کی حوصلہ افزائی ہمارا قومی فریضہ ہے۔ یہ وہ ہیرو ہیں جنہوں نے اپنی جان کی پرواہ کیے بغیر وطن کی خدمت کو مقدم جانا۔”
انہوں نے مزید کہا کہ:
"قوم ان عظیم سپوتوں کی ہمیشہ ممنون و مشکور رہے گی۔ شہدا اس دھرتی کے ماتھے کا جھومر ہیں اور غازی ہمارے فخر کا نشان۔ ان کی قربانیوں کو تاریخ کبھی فراموش نہیں کرے گی۔”
اجلاس کی تفصیلات
یہ اہم اجلاس کابینہ ڈویژن میں منعقد ہوا، جس میں وزارت داخلہ اور کابینہ ڈویژن کے اعلیٰ حکام، بشمول اسپیشل سیکرٹری داخلہ، ایڈیشنل سیکریٹریز، اور انٹیلی جنس بیورو کے ڈپٹی ڈی جی نے شرکت کی۔تمام صوبوں بشمول آزاد کشمیر اور گلگت بلتستان کے ایڈیشنل چیف سیکریٹریز اور سیکریٹریز داخلہ نے ویڈیو لنک کے ذریعے اجلاس میں شرکت کی اور اپنی سفارشات پیش کیں۔
قومی عزم کا اعادہ
محسن نقوی نے اس موقع پر اس عزم کا اعادہ کیا کہ:
"شہدا اور غازیوں کی قربانیاں ہرگز رائیگاں نہیں جانے دی جائیں گی۔ ان کی خدمات ہماری قومی پہچان کا حصہ ہیں، اور نئی نسل کو ان سے روشناس کرانا ہماری اولین ترجیح ہونی چاہیے۔”
Discussion about this post