شہر قائد میں یکم اپریل کی رات سے بارش کا آغاز ہوسکتا ہے

محکمۂ موسمیات نے کراچی والوں کے لیے ایک خوشگوار اور تازگی بخش خبر کا اعلان کر دیا ہے۔ مغربی ہواؤں کا ایک نیا سلسلہ یکم اپریل کو ایران کے راستے بلوچستان میں داخل ہونے والا ہے، جس کے زیرِ اثر کراچی میں یکم اپریل کی رات سے بارش کا آغاز ہو سکتا ہے۔ محکمہ کے مطابق دو اپریل کو بارش کا امکان سب سے زیادہ ہے، جبکہ تین اپریل کو بھی شہر کے مختلف علاقوں میں بارش متوقع ہے۔ بعض مقامات پر بارش کی شدت 50 ملی میٹر یا اس سے بھی زیادہ ہو سکتی ہے۔ اس موسمی نظام کے ساتھ تیز ہوائیں بھی چلنے کا امکان ہے جن کی رفتار 50 کلو میٹر فی گھنٹہ یا اس سے زائد تک پہنچ سکتی ہے۔محکمۂ موسمیات کا تخمینہ ہے کہ یہ سسٹم چار اپریل تک ملک کے مختلف علاقوں پر اثر انداز رہے گا۔  کراچی کے شہریوں کے لیے یہ بارشوں کا سلسلہ گرمی کی شدت میں کمی لانے، فضا کو خوشگوار بنانے اور ماحول کو تازگی بخشنے والا ثابت ہو سکتا ہے۔ تاہم تیز ہواؤں اور ممکنہ شدید بارش کی وجہ سے شہریوں کو احتیاط برتنے کی بھی ہدایت کی گئی ہے۔