کراچی : نئی نمبر پلیٹس کے لیے 14 اگست تک مہلت

صوبائی وزیر برائے ایکسائز اینڈ ٹیکسیشن مکیش کمار چاؤلہ نے کہا ہے کہ پرانی نمبر پلیٹس رکھنے والی گاڑیوں کے خلاف 14 اگست 2025 تک کوئی کارروائی نہیں کی جائے گی۔ انہوں نے بتایا کہ نئی اجرک ڈیزائن والی نمبر پلیٹس پورے سندھ میں لازمی قرار دی گئی ہیں، اور تمام گاڑی مالکان کو مقررہ تاریخ تک نئی پلیٹس حاصل کرنا ہوں گی۔ مکیش چاؤلہ کا کہنا تھا کہ اب تک 20 لاکھ سے زائد نئی نمبر پلیٹس جاری کی جا چکی ہیں۔ ان کے مطابق کار یا دیگر چار پہیوں والی گاڑی کے لیے پلیٹ کی فیس 2,450 روپے جبکہ موٹر سائیکل کے لیے 1,850 روپے ہے۔ انہوں نے کہا کہ فیس میں کسی قسم کی کمی نہیں کی جائے گی، تاہم اگر عوام کی طرف سے مطالبہ ہوا تو آخری تاریخ میں توسیع پر غور کیا جا سکتا ہے۔

ان کا کہنا تھا کہ سندھ بھر میں نمبر پلیٹس سے متعلق ایک ہی قانون نافذ ہے اور اس پر سب کو عمل کرنا ہوگا۔دوسری جانب شہریوں کی جانب سے نئی پلیٹس کے عمل، فیس اور ٹریفک پولیس کی جانب سے چالان پر شکایات سامنے آئی ہیں، جن پر جماعت اسلامی اور ایم کیو ایم نے بھی حکومت سے اقدامات کا مطالبہ کیا ہے۔