کراچی کے پوش علاقے ڈیفنس خیابان اتحاد کمرشل میں موٹرسائیکل سوار نوجوان پر تشدد کے کیس میں نیا موڑ سامنے آیا ہے، جہاں متاثرہ نوجوان سدھیر نے عدالت میں پیش ہو کر دونوں ملزمان کی شناخت کر لی، مگر ساتھ ہی معافی کا اعلان کر کے سب کو حیران کر دیا۔ واقعے کے مرکزی ملزم سلمان فاروقی سمیت دو ملزمان کو جوڈیشل مجسٹریٹ جنوبی کی عدالت میں پیش کیا گیا۔ عدالت نے متاثرہ نوجوان سے سوال کیا کہ کیا وہ کسی دباؤ میں ہے؟ جس پر سدھیر کا کہنا تھا:
"میں کوئی کیس نہیں کرنا چاہتا، میں نے ملزمان کو معاف کر دیا ہے، عدالت جو بھی فیصلہ کرے، مجھے کوئی اعتراض نہیں۔”
سدھیر نے مزید بتایا کہ انہیں عدالت میں پیشی کے متعلق علم نہیں تھا، اور وہ صرف وکیل کی اطلاع پر عدالت پہنچے۔ عدالت نے اس بیان کے باوجود دونوں ملزمان کو دو روزہ جسمانی ریمانڈ پر پولیس کے حوالے کر دیا۔ یاد رہے کہ یہ واقعہ یکم جون کو پیش آیا تھا، جب خیابان اتحاد کمرشل میں ایک گاڑی سوار نے موٹرسائیکل سوار نوجوان کو مبینہ طور پر صرف معمولی سی ٹکر پر تشدد کا نشانہ بنایا تھا۔ پولیس کے مطابق متاثرہ نوجوان اپنی بہنوں کے ہمراہ تھا، جب حادثہ پیش آیا۔ واقعے کی ویڈیو سوشل میڈیا پر وائرل ہونے کے بعد شہری حلقوں میں غم و غصہ کی لہر دوڑ گئی تھی اور واقعے کی شفاف تحقیقات کا مطالبہ کیا گیا تھا۔
Discussion about this post